امریکا نے غیر قانونی طور پر داخل ہونے والے بھارتی تارکینِ وطن کو ملک بدر کرنا شروع کردیا ہے۔
بھارتی میڈیا کے مطابق 120 بھارتی شہریوں کو لے کر ایک خصوصی پرواز آج رات بھارت پہنچے گی، جب کہ 16 فروری کو ایک اور پرواز مزید 157 بھارتی تارکینِ وطن کو لے کر بھارت پہنچے گی۔اس سے قبل 5 فروری کو 104 غیر قانونی بھارتی شہریوں کو بھی امریکی طیارے کے ذریعے واپس بھیجا گیا تھا۔ بھارتی میڈیا کے مطابق ان میں سے زیادہ تر افراد غیر قانونی طریقوں، جیسے "ڈنکی روٹس" کے ذریعے امریکا میں داخل ہوئے تھے۔امریکی حکام کی جانب سے غیر قانونی امیگریشن کے خلاف سخت اقدامات کیے جا رہے ہیں، اور اس دوران بڑی تعداد میں بھارتی شہریوں کو حراست میں لے کر ملک بدر کیا جا رہا ہے۔
