ویب ڈیسک:پاکستان تحریک انصاف (پی ٹی آئی) آج صوابی میں پاور شو کرنے جارہی ہے، جس کے لیے پارٹی کے رہنماؤں اور کارکنوں کی بڑی تعداد موجود ہوگی۔
اپوزیشن لیڈر پنجاب اسمبلی، ملک احمد بھچر نے اس جلسے میں شرکت کا عزم ظاہر کرتے ہوئے کہا کہ انہیں کوئی رکاوٹ نہیں روک سکتی اور وہ میانوالی سے قافلے کی صورت میں جلسہ گاہ پہنچیں گے۔پی ٹی آئی لاہور کے صدر، شیخ امتیاز نے بھی اس عزم کا اظہار کیا کہ لاہور کی قیادت آج دوپہر ایک بجے تک ہر صورت صوابی پہنچے گی۔ اس جلسے کی تیاریوں کے حوالے سے لاہور کی قیادت فعال ہوچکی ہے، اور کچھ لوگ پہلے ہی صوابی پہنچ چکے ہیں، جبکہ دیگر لوگ روانگی کی تیاری میں ہیں۔صوابی میں پی ٹی آئی کے جلسے کے معاملے پر پنجاب حکومت بھی متحرک ہو گئی ہے۔ راولپنڈی اور اٹک پولیس کو کسی بھی ہنگامی صورتحال سے نمٹنے کے لیے الرٹ کردیا گیا ہے۔ سینٹرل پولیس آفس لاہور نے چار اضلاع کے ڈی پی اوز سمیت پنجاب کانسٹیبلری اور ہائی وے پیٹرولنگ پولیس کی ڈیڑھ ہزار پولیس فورس کو آر پی او راولپنڈی کے حوالے کردیا ہے۔
اس مراسلے کے مطابق، ڈی پی اوز اٹک، چکوال، گجرات اور منڈی بہاءالدین کو 200، 200 پولیس اہلکاروں کے ساتھ فوراً راولپنڈی رپورٹ کرنے کی ہدایت کی گئی ہے۔ پنجاب کانسٹیبلری کی 500 اور پنجاب ہائی وے پیٹرولنگ کی 200 نفری کو بھی راولپنڈی اور اٹک رپورٹ کرنے کے لیے کہا گیا ہے۔تمام فورسز کو فسادات سے نمٹنے کے لیے ضروری آنسو گیس شیلز اور دیگر اینٹی رائٹ آلات سے لیس کیا جائے گا، اور ان فورسز کی ٹرانسپورٹیشن، کھانے اور رہائش کے انتظامات کی ذمہ داری سی پی او راولپنڈی اور ڈی پی او اٹک کے ذمہ ہوگی۔ اس سے ظاہر ہوتا ہے کہ پنجاب حکومت اس جلسے کے دوران ممکنہ بدامنی یا تشویش کو روکنے کے لیے سخت انتظامات کر رہی ہے۔
