ن لیگ کے مرکزی رہنما اور وفاقی وزیر دفاع خواجہ آصف نے گٹر کے ڈھکن چوروں کے خلاف سخت ردعمل کا اظہار کیا ہے۔
انہوں نے سماجی رابطے کی سائٹ ایکس (پہلے ٹوئٹر) پر جاری بیان میں کہا کہ گٹر کے ڈھکن چرانے والوں کو سرعام گولی مارنی چاہیے۔ خواجہ آصف نے ویڈیو وائرل ہونے پر شدید برہمی کا اظہار کرتے ہوئے کہا کہ اگر ان کا ویڈیو ریکارڈ موجود ہے تو ان کو موقع پر لا کر گولی مارنی چاہئے کیونکہ یہ معصوم بچوں کے قاتل ہیں۔ انہوں نے مزید کہا کہ اگر اس کے بعد بھی کوئی کارروائی نہیں کی جاتی تو پھر سسٹم بھی ان بچوں کے قتل کا سہولت کار ہے۔انہوں نے یہ بھی زور دیا کہ ایسے لوگوں کو عبرتناک سزا دی جائے تاکہ آئندہ کوئی بھی گٹر کے ڈھکن چوری کرنے کا سوچ بھی نہ سکے۔
خواجہ آصف کا یہ بھی کہنا تھا کہ یہ لوگ صرف بچوں کے قتل کے ذمہ دار نہیں بلکہ جرائم کی جڑ ہیں، اور ان کی سرزنش ضروری ہے تاکہ معاشرے میں انصاف قائم رہے۔یاد رہے کہ چند روز قبل کراچی کے علاقے نیپا چورنگی کے قریب ایک 3 سالہ بچہ کھلے مین ہول میں گر گیا تھا، جس کی لاش 15 گھنٹے بعد نکالی گئی۔ اس واقعے کے بعد سوشل میڈیا پر ڈھکن چوری کی متعدد ویڈیوز وائرل ہو رہی ہیں جن پر صارفین غصہ اور افسوس کا اظہار کر رہے ہیں۔ اس واقعے نے عوام میں گٹر کے ڈھکن چوری اور حفاظتی انتظامات کے بارے میں تشویش پیدا کی ہے۔
