کاہنہ خیابان جناح میں پیش آنے والے پرتشدد مقابلے کی ویڈیو منظر عام پر آگئی ہے، جس میں پولیس اور ڈاکوؤں کے درمیان شدید فائرنگ دیکھی جا سکتی ہے۔
واقعہ خیابان جناح چوک پر پیش آیا، جہاں ڈاکوؤں نے پولیس کی جانب سے گاڑی روکنے پر فائرنگ شروع کر دی۔ پولیس کی جوابی کارروائی میں دو ڈاکو ہلاک ہوگئے، جبکہ کانسٹیبل رزاق ڈوگر اپنی جان کی بازی ہار گئے۔ویڈیو میں دیکھا جا سکتا ہے کہ راہگیر خوفزدہ ہو کر بھاگنے لگے، اور مرکزی شاہراہ پر چلتی گاڑیاں گولیوں کی زد سے بچنے کے لیے واپس پلٹتی رہیں۔ اس مقابلے کے دوران ڈاکوؤں کی ساتھی خاتون رابعہ بھی پولیس کے ہتھے چڑھ گئی۔ اطلاعات کے مطابق یہ ڈکیت گینگ شیخوپورہ میں واردات کے بعد لاہور میں ٹریس کیا گیا تھا، اور خاتون دوران فائرنگ میگزین لوڈ کرنے میں مدد فراہم کر رہی تھی۔
پولیس کے مطابق معاملے کی مزید تحقیقات جاری ہیں تاکہ دیگر ملوث افراد کو گرفتار کیا جا سکے اور گینگ کے دیگر منصوبے ناکام بنائے جائیں۔ یہ واقعہ شہر میں بڑھتی ہوئی امن و امان کی صورتحال پر تشویش پیدا کر رہا ہے، اور شہریوں کی حفاظت کے لیے پولیس کی جانب سے اضافی اقدامات کی ضرورت پر زور دیا جا رہا ہے۔
