ایران میں امریکی میزائل حملے کے نتیجے میں 21 شہری جاں بحق ہوئے، جن میں نوعمر لڑکے اور لڑکیاں بھی شامل ہیں۔
واقعہ صوبہ فارس کے شہر لامرد میں پیش آیا، جہاں ایک اسپورٹس ہال میں نوجوان اور شہری موجود تھے۔ایرانی وزارت خارجہ کے ترجمان اسماعیل بقائی نے بتایا کہ حملہ امریکی نئے پریسجن اسٹرائیک میزائل سے کیا گیا، جو اپنے ہدف سے اوپر پھٹتا ہے، اور دھماکے سے ہزاروں مہلک ٹکڑے (ٹنگسٹن پیلٹس) ہر جانب پھیل جاتے ہیں تاکہ زیادہ سے زیادہ جانی نقصان ہو۔بقائی نے اس حملے کو "قابل نفرت جنگی جرم" قرار دیتے ہوئے کہا کہ امریکی افواج نے جان بوجھ کر شہریوں کو نشانہ بنایا۔ ایرانی حکام نے واقعے کی شدید مذمت کی اور عالمی برادری سے مطالبہ کیا کہ ایسے حملوں کے خلاف فوری اقدامات کیے جائیں۔
حملے کے بعد علاقے میں ریسکیو اور ایمبولینس کی ٹیمیں تعینات کی گئیں تاکہ زخمیوں کو ہسپتال منتقل کیا جا سکے۔ ایرانی میڈیا نے ہال میں تباہی اور دھوئیں کی تصاویر نشر کیں، جبکہ مقامی سیکیورٹی فورسز نے علاقے کو گھیرے میں لے کر امدادی کارروائیاں شروع کیں۔یہ حملہ اس تنازعے کے دوران شہری علاقوں پر ہونے والے مہلک حملوں کی تازہ ترین مثال ہے، جس سے انسانی حقوق کی خلاف ورزی اور بین الاقوامی قوانین کی پامالی کے خدشات بڑھ گئے ہیں۔
