پنجاب کی وزیرِ اطلاعات عظمیٰ بخاری نے محرم الحرام کے دوران امن و امان قائم رکھنے اور ممکنہ خطرات سے نمٹنے کے لیے سیکیورٹی ہائی الرٹ کرنے کا اعلان کیا ہے۔
انہوں نے کہا کہ موجودہ خطے کی صورتحال، خصوصاً پاکستان اور بھارت کے درمیان کشیدگی کے بعد سیکیورٹی اقدامات مزید سخت کر دیے گئے ہیں۔
سیکیورٹی اقدامات:
محرم الحرام میں امن و امان یقینی بنانے کے لیے پولیس، اسپیشل برانچ اور دیگر اداروں کو مکمل الرٹ کر دیا گیا ہے۔جلوسوں کے راستوں پر اضافی کیمرے نصب کیے جا رہے ہیں تاکہ سرویلنس کو مؤثر بنایا جا سکے۔سوشل میڈیا پر نفرت انگیز پوسٹس یا فرقہ وارانہ مواد کی اشاعت پر فوری گرفتاری عمل میں لائی جائے گی۔
ڈرون پر مکمل پابندی:
عظمیٰ بخاری نے واضح کیا کہ محرم کے دوران جلوسوں کی کوریج یا کسی اور مقصد کے لیے ڈرون کیمروں کے استعمال کی اجازت نہیں ہوگی۔خلاف ورزی کی صورت میں ڈرون اڑانے والے افراد کو فوراً گرفتار کیا جائے گا۔
بیان کا مقصد:
عظمیٰ بخاری نے اپنے بیان میں کہا کہ حکومت پنجاب کی اولین ترجیح عوام کے جان و مال کا تحفظ اور فرقہ وارانہ ہم آہنگی کا قیام ہے۔ محرم کے دوران کسی بھی قسم کی بدامنی یا افواہ پھیلانے کی اجازت نہیں دی جائے گی۔انہوں نے عوام سے اپیل کی کہ وہ قانون نافذ کرنے والے اداروں کے ساتھ مکمل تعاون کریں، اور کسی بھی مشتبہ سرگرمی کی فوری اطلاع قریبی تھانے یا ہیلپ لائن پر دیں۔
