ایران کے ایک سینئر سفارتی عہدیدار نے کہا ہے کہ موجودہ علاقائی کشیدگی کے باوجود تہران نے سفارت کاری کا دروازہ بند نہیں کیا اور مختلف علاقائی ثالثوں کے ذریعے امریکا کے ساتھ پیغامات کا تبادلہ اب بھی جاری ہے۔
غیر ملکی میڈیا سے گفتگو کرتے ہوئے ایرانی عہدیدار نے الزام عائد کیا کہ امریکا ایران کے اہم بنیادی ڈھانچے کو نشانہ بنا کر بین الاقوامی قوانین کی خلاف ورزی کر رہا ہے۔ ان کے مطابق شہری تنصیبات پر حملے جنگی جرائم کے زمرے میں آ سکتے ہیں اور ایسے اقدامات امریکا کی بے بسی کو ظاہر کرتے ہیں۔سینئر ایرانی سفارتی ذریعے کا کہنا تھا کہ ایران نے ہمیشہ مذاکرات اور سفارتی حل کو ترجیح دی ہے، تاہم امریکا کی دھمکی آمیز پالیسی، جارحانہ اقدامات اور مسلسل فوجی کارروائیوں نے مذاکرات کے ماحول کو شدید متاثر کیا ہے۔انہوں نے کہا کہ ایران اب بھی اختلافات کے حل کے لیے سفارتی راستے کو اہم سمجھتا ہے، لیکن اپنی قومی سلامتی اور مفادات کے تحفظ کے لیے تمام ممکنہ آپشنز بھی زیر غور رکھے ہوئے ہے۔ایرانی عہدیدار نے مزید دعویٰ کیا کہ موجودہ بحران کی بنیادی وجہ 17 جون کو ہونے والی مفاہمتی یادداشت سے امریکا کی مبینہ دستبرداری ہے۔
ان کے مطابق واشنگٹن نے اپنے وعدوں پر عمل نہیں کیا، جس کے باعث خطے میں کشیدگی دوبارہ شدت اختیار کر گئی۔انہوں نے کہا کہ اگر امریکا اپنی پالیسی میں تبدیلی لاتا ہے اور معاہدے کی شرائط کا احترام کرتا ہے تو سفارتی پیش رفت کی گنجائش موجود ہے، تاہم موجودہ حالات میں تہران اپنی دفاعی، سیاسی اور سفارتی حکمت عملی پر عمل جاری رکھے گا۔دوسری جانب، تاحال امریکی حکومت کی جانب سے ایرانی عہدیدار کے ان الزامات یا دعوؤں پر کوئی باضابطہ ردعمل سامنے نہیں آیا۔
