لاہور میں قربان لائن ریلوے پھاٹک کے قریب کوڑے دان سے ایک نومولود بچی زندہ حالت میں برآمد ہوئی ہے۔
ریسکیو 1122 کے عملے نے بچی کو ابتدائی طبی امداد فراہم کرنے کے بعد مزید علاج اور نگہداشت کے لیے قریبی سرکاری اسپتال منتقل کر دیا۔ریسکیو 1122 کے مطابق اطلاع ملنے پر امدادی اہلکار موقع پر پہنچے، جہاں کوڑے دان سے نومولود بچی کو زندہ حالت میں پایا گیا۔ ریسکیو اہلکاروں نے فوری طور پر بچی کو ابتدائی طبی امداد فراہم کی۔
بچی کی حالت تسلی بخش، اسپتال منتقل
ریسکیو حکام کا کہنا ہے کہ ابتدائی طبی امداد کے بعد بچی کی حالت ٹھیک تھی۔ تاہم احتیاطی طبی معائنے، مزید علاج اور بہتر نگہداشت کے لیے اسے قریبی سرکاری اسپتال منتقل کر دیا گیا ہے۔واقعے کے حوالے سے نومولود بچی کو کوڑے دان میں چھوڑنے کی وجوہات اور ذمہ دار افراد سے متعلق مزید تفصیلات سامنے نہیں آئیں۔
