بھارتی آل راؤنڈر واشنگٹن سندر انجری کے باعث انگلینڈ کے خلاف لارڈز میں کھیلے جانے والے تیسرے اور فیصلہ کن ون ڈے میچ سے باہر ہو گئے ہیں۔
واشنگٹن سندر کو کارڈف میں کھیلے گئے دوسرے ون ڈے کے دوران ٹانگ میں تکلیف کا سامنا کرنا پڑا، جس کے بعد وہ فیلڈنگ کے لیے دوبارہ میدان میں واپس نہ آ سکے۔بھارتی بیٹنگ کوچ سیتانشو کوٹک کے مطابق سندر کو اننگز کے دوران پہلا رن لینے کی کوشش میں ہیم اسٹرنگ انجری ہوئی، جو بظاہر سنجیدہ نوعیت کی ہے۔ آل راؤنڈر صرف 2 رنز بنانے کے بعد ریٹائرڈ ہرٹ ہو کر پویلین واپس چلے گئے تھے۔واشنگٹن سندر نے سیریز کے پہلے ون ڈے میں شاندار کارکردگی کا مظاہرہ کرتے ہوئے ناقابل شکست نصف سنچری اسکور کی تھی اور بھارت کی کامیابی میں اہم کردار ادا کیا تھا۔سندر کی انجری نے بھارتی ٹیم کی مشکلات میں اضافہ کر دیا ہے کیونکہ ہاردک پانڈیا اور نتیش کمار ریڈی بھی فٹنس مسائل کے باعث دستیاب نہیں ہیں۔ ان حالات میں بھارت کے پاس آل راؤنڈ آپشنز محدود ہو گئے ہیں۔
اگر بھارتی ٹیم تیسرے ون ڈے میں اضافی اسپن آپشن کے ساتھ میدان میں اترنے کا فیصلہ کرتی ہے تو بائیں ہاتھ کے لیگ اسپنر کلدیپ یادیو کو ٹیم میں شامل کیے جانے کا امکان ہے، جو حالیہ عرصے میں مستقل طور پر پلیئنگ الیون کا حصہ نہیں بن سکے۔بھارت اور انگلینڈ کے درمیان ون ڈے سیریز کا تیسرا اور فیصلہ کن مقابلہ لارڈز میں کھیلا جائے گا، جہاں دونوں ٹیمیں سیریز اپنے نام کرنے کے لیے میدان میں اتریں گی۔
