پاکستان ،سپین کیساتھ تعلقات کو مضبوط بنانے کے لیے پرعزم:سینیٹر عرفا ن صدیقی

بہتر تعاون کے ذریعے دہشت گردی اور اقتصادی عدم استحکام جیسے اہم عالمی چیلنجوں سے نمٹ سکتے ہیں
اسلا م آباد(آئی این پی )سینیٹ کی قائمہ کمیٹی برائے خارجہ امور کے چیئرمین سینیٹر عرفان الحق صدیقی نے کہا ہے کہ پاکستان ،سپین کے ساتھ تعلقات کو مضبوط بنانے کے لیے پرعزم ہے، بہتر تعاون کے ذریعے، ہم موسمیاتی تبدیلی، دہشت گردی، اور اقتصادی عدم استحکام جیسے اہم عالمی چیلنجوں سے نمٹ سکتے ہیں، اور ایک زیادہ محفوظ اور خوشحال دنیا کے لیے مل کر کام کر سکتے ہیں۔تفصیل کے مطابق سینیٹ کی قائمہ کمیٹی برائے خارجہ امور کے چیئرمین سینیٹر عرفان الحق صدیقی کی میزبانی میں منعقدہ اجلاس میں سپین کی سینیٹ کی امور کی کمیٹی کے ایک اعلیٰ سطحی پارلیمانی وفد نے پاکستانی قانون سازوں کے ساتھ تفصیلی تبادلہ خیال کیا۔ ملاقات میں پاکستان اور سپین کے درمیان سفارتی تعلقات کو مزید گہرا کرنے اور عالمی چیلنجز بشمول آفات سے نجات، موسمیاتی تبدیلی، انسداد دہشت گردی اور اقتصادی ترقی کے سلسلے میں تعاون کے مشترکہ عزم پر زور دیا گیا۔سینیٹر صدیقی نے ہسپانوی وفد کا پرتپاک خیرمقدم کیا جس میں پاکستان میں سپین کے سفیر بھی شامل تھے۔ انہوں نے سپین میں حالیہ تباہ کن سیلابوں کی روشنی میں ہسپانوی عوام کے ساتھ گہری یکجہتی کا اظہار کیا۔ سینیٹر صدیقی نے دونوں ممالک کے درمیان پارلیمانی تعاون کو بڑھانے کی تجویز پیش کی، خاص طور پر آفات سے نمٹنے، امدادی انتظامات اور بحالی کی کوششوں پر توجہ مرکوز کی۔