ویب ڈیسک: ملک بھر میں چینی کی قیمتیں ایک بار پھر آسمان سے باتیں کرنے لگیں، جس کے باعث عوام شدید پریشانی کا شکار ہو گئے ہیں۔
کراچی، ملتان، فیصل آباد سمیت مختلف شہروں میں چینی کی فی کلو قیمت 200 روپے تک پہنچ چکی ہے، جبکہ پنجاب کے کئی علاقوں میں یہ قیمت 180 سے 195 روپے فی کلو کے درمیان ہے۔
کراچی میں چینی نے ڈبل سنچری مکمل کی
کراچی میں چینی 200 روپے فی کلو میں فروخت ہو رہی ہے۔مقامی دکانداروں کے مطابق:"ریٹ روز بروز بڑھ رہے ہیں اور حکومتی کنٹرول کا کوئی نام و نشان نہیں۔"
فیصل آباد اور دیگر شہروں کی صورتحال
فیصل آباد میں چینی کی قیمت 180 روپے فی کلو تک پہنچ گئی۔دکانداروں کا کہنا ہے کہ انہیں مہنگے داموں چینی مل رہی ہے، ایسے میں سستا بیچنا ممکن نہیں۔کئی دکانداروں کو صرف ایک یا دو تھیلے ہی دستیاب ہو رہے ہیں۔
ملتان میں نرخ سرکاری حد سے دوگنے
ملتان میں چینی کی قیمت نے سب کو حیران کر دیا ہے:سرکاری نرخ کے مطابق چینی 90 روپے فی کلو ہونی چاہیے۔مگر اوپن مارکیٹ میں یہی چینی 190 سے 200 روپے میں فروخت ہو رہی ہے۔ہول سیل مارکیٹ میں بھی چینی کی قیمت 180 روپے فی کلو تک پہنچ گئی ہے۔
عوام اور دکاندار دونوں بےحال
مہنگائی کے ستائے عوام کا کہنا ہے کہ:"چینی، پیٹرول، گیس اور بجلی سب کچھ مہنگا ہو چکا ہے، زندگی گزارنا مشکل ہو گیا ہے۔"دکانداروں نے بھی شکایت کرتے ہوئے کہا:"ہمیں چینی مہنگی قیمت پر مل رہی ہے، ایسے میں سستے داموں فروخت کرنا ممکن نہیں۔"
حکومتی خاموشی اور کنٹرول کا فقدان
مارکیٹ میں چینی کی شدید قلت، بے قابو قیمتیں، اور سرکاری نرخوں پر عمل درآمد کا نہ ہونا حکومت کے لیے لمحہ فکریہ بن چکا ہے۔ عوام کی جانب سے مطالبہ کیا جا رہا ہے کہ فوری طور پر قیمتوں پر کنٹرول کیا جائے، ذخیرہ اندوزوں کے خلاف کارروائی ہو، اور سرکاری ریٹ پر چینی کی دستیابی یقینی بنائی جائے۔
