امریکی سینیٹ کے بعد ایوان نمائندگان میں بھی حکومتی اخراجات سے متعلق بل منظور، جس کے نتیجے میں امریکی تاریخ کا طویل ترین شٹ ڈاؤن ختم ہو گیا ہے۔
ایوان نمائندگان میں 6 ڈیموکریٹس سمیت 222 ارکان نے بل کی حمایت میں ووٹ دیا، جبکہ 2 ریپبلکن سمیت 209 ارکان نے اس کی مخالفت کی۔امریکی میڈیا کے مطابق، اس بل کو دستخط کے لیے صدر ڈونلڈ ٹرمپ کو بھیج دیا گیا ہے۔عارضی فنڈنگ بل کی منظوری کے بعد یکم اکتوبر سے جاری طویل ترین شٹ ڈاؤن ختم ہو گیا ہے۔خبر ایجنسی کے مطابق، حکومت کو 30 جنوری تک فنڈز فراہم کیے جائیں گے، جس سے حکومتی مالی سرگرمیاں بغیر کسی رکاوٹ کے جاری رہ سکیں گی۔اس بل کا مقصد غذائی امدادی اسکیموں کی بحالی، تنخواہوں کی ادائیگی، اور ائیر ٹریفک کنٹرول نظام کو دوبارہ فعال کرنا ہے۔یہ اقدام امریکی قانون سازوں کی جانب سے طویل مالی بحران اور وفاقی خدمات میں خلل کے بعد اٹھایا گیا ہے، جس نے ملک بھر میں سرکاری اداروں کی کارکردگی کو متاثر کیا تھا۔
