بھارتی ٹی وی کی مشہور اداکارہ سپنا سنگھ کے 14 سالہ بیٹے، ساگر گنگوار کی لاش گزشتہ اتوار کو بریلی کے عزت نگر پولیس اسٹیشن کے علاقے سے ملی تھی۔
لڑکے کی موت کی تحقیقات شروع ہوئیں اور اس کے بعد سپنا سنگھ نے احتجاج کیا تھا۔ ابتدائی طور پر، پولیس نے مقتول کے دوستوں کے خلاف کارروائی کی یقین دہانی کرائی، جس کے بعد سپنا سنگھ نے اپنا احتجاج ڈیڑھ گھنٹے بعد ختم کر دیا۔پوسٹ مارٹم رپورٹ میں لڑکے کی موت کی صحیح وجہ کی تصدیق نہیں کی جا سکی، تاہم رپورٹ میں اس بات کا ذکر تھا کہ ساگر نے زہر یا منشیات کی زیادہ مقدار لی تھی۔ اس کے بعد پولیس نے مقتول کے دو دوستوں، انوج اور سنی کو قتل کے الزام میں گرفتار کیا۔
پولیس کے مطابق، ان دونوں نے تفتیش کے دوران اعتراف کیا کہ وہ ساگر کے ساتھ منشیات اور شراب نوشی کر رہے تھے اور اس دوران ساگر نے زیادہ مقدار لے لی، جس کے نتیجے میں وہ بے ہوش ہو گیا۔انوج اور سنی نے مزید بتایا کہ وہ گھبرا گئے تھے اور ساگر کو بے ہوش حالت میں ایک کھیت میں گھسیٹ کر چھوڑ دیا۔ پولیس کی تحقیقات کے مطابق، ساگر آٹھویں جماعت کا طالب علم تھا اور بریلی کے علاقے آنند وہار کالونی میں اپنے ماموں، اوم پرکاش کے ساتھ رہ رہا تھا۔یہ واقعہ سپنا سنگھ کے لیے ایک صدمہ بن گیا ہے، اور اس نے پولیس سے انصاف کی امید ظاہر کی ہے۔ پولیس اب اس معاملے میں مزید تحقیقات کر رہی ہے تاکہ اس کے پیچھے کی حقیقت سامنے آ سکے اور قاتلوں کو کیفر کردار تک پہنچایا جا سکے۔
