مغربی، وسطی اور شمال مغربی بحیرۂ عرب میں موجود شدید سمندری طوفان "شکتی" (Cyclone Shakti) نے شدت کھو دی ہے اور گزشتہ 6 گھنٹوں کے دوران کمزور ہو کر ایک سمندری طوفان (Cyclonic Storm) کی شکل اختیار کر لی ہے۔
محکمہ موسمیات (PMD) کے مطابق، شکتی سے متعلق گیارہواں الرٹ جاری کر دیا گیا ہے۔محکمہ کے مطابق طوفان کا مرکز اس وقت کراچی سے تقریباً 910 کلومیٹر جنوب مغرب میں واقع ہے۔
مزید کمزور ہونے کا امکان
موسمیاتی ماہرین کے مطابق، توقع ہے کہ یہ طوفان اپنی موجودہ سمت یعنی مشرق-جنوب مشرق (East-Southeast) کی جانب بڑھتے ہوئے آئندہ 24 گھنٹوں میں مزید کمزور ہو کر ایک دباؤ (Depression) میں تبدیل ہو جائے گا۔
ہلکی بارش اور تیز ہواؤں کا امکان
محکمہ موسمیات نے بتایا کہ طوفان کے اثرات کے باعث سندھ اور بلوچستان کے ساحلی علاقوں میں آج ہلکی بارش کا امکان ہے۔اسی دوران سمندری ہوائیں 70 سے 90 کلومیٹر فی گھنٹہ کی رفتار سے چل سکتی ہیں جس کے نتیجے میں سمندر میں طغیانی برقرار رہنے کا خدشہ ہے۔
ماہی گیروں کے لیے انتباہ
محکمہ موسمیات نے ماہی گیروں کو 7 اکتوبر تک گہرے سمندر میں نہ جانے کا مشورہ دیا ہے کیونکہ سمندری لہریں بلند رہنے کا امکان ہے۔محکمہ کے مطابق سائیکلون وارننگ سینٹر کراچی طوفان کی مسلسل نگرانی کر رہا ہے اور ہر چند گھنٹوں بعد تازہ معلومات جاری کی جا رہی ہیں۔
کراچی میں بارش
واضح رہے کہ سمندری طوفان کے اثرات کے باعث گزشتہ شب کراچی کے مغربی، وسطی اور شمالی علاقوں میں ہلکی سے تیز بارش ریکارڈ کی گئی، جس سے موسم خوشگوار ہو گیا۔
