پی ٹی آئی دور :گجرات میں منصوبوں میں بے ضابطگیاں

کسی طرح کی دستاویزات مکمل کرنا مناسب نہ سمجھا گیا : آڈٹ رپورٹ میں انکشاف 
لاہور(خصوصی رپورٹ )پاکستان تحریک انصاف کے دور میں گجرات میں قانونی تقاضے پورے کئے بغیر ترقیاتی منصوبے شروع کئے جانے کا انکشاف ہوا ہے ، ترقیاتی منصوبوں کیلئے پی سی ون سمیت کسی طرح کی دستاویزات مکمل کرنا ہی مناسب نہ سمجھا گیا۔پنجاب اسمبلی میں پیش کی گئی مالی سال 20-19کی آڈٹ رپورٹ کی دستاویز کے مطابق قانونی تقاضے پورے کئے بغیر ترقیاتی منصوبوں میں 87ملین روپے کی مالی بے ضابطگیاں کی گئیں۔ آڈٹ ڈیپارٹمنٹ نے پی سی ون کے بغیر ترقیاتی منصوبوں پر پوچھ گچھ کی تو مالی بے ضابطگیاں چھپانے کے لئے میٹرو پولیٹن کارپوریشن گجرات نے حیرت انگیز طور پر بغیر منظوری پی سی ون پیش کر دیا۔بتایا گیا ہے کہ ڈویلپمنٹ کمیٹی نے پی سی ون کی منظوری دی نہ ہی ڈویلپمنٹ کمیٹی نے پی سی ون دیکھا،ذرائع کے مطابق 1.50 ملین روپے سے زائد رقم کے لئے پی سی ون تیار کیا جانا ضروری ہے۔