پاکستانی شوبز انڈسٹری کی معروف اداکارہ سارہ خان نے اپنے شوہر اور گلوکار فلک شبیر سے متعلق دلچسپ انداز میں تبصرہ کرتے ہوئے انہیں مقبول پاکستانی ڈرامے کے کردار ’ابوبکر‘ سے بھی آگے قرار دے دیا۔
سارہ خان نے حال ہی میں ندا یاسر کے مارننگ شو میں شرکت کی، جہاں انہوں نے اپنی ازدواجی زندگی، شوہر کے مزاج اور شخصیت میں آنے والی تبدیلیوں کے حوالے سے گفتگو کی۔اداکارہ نے بتایا کہ شادی کے بعد انہوں نے فلک شبیر سے زندگی کو پرسکون انداز میں گزارنا سیکھا ہے۔ ان کے مطابق وہ پہلے چھوٹی چھوٹی باتوں پر پریشان ہو جایا کرتی تھیں اور معمولی معاملات کو بھی زیادہ سوچتی تھیں، تاہم فلک کے ساتھ زندگی گزارنے کے بعد ان کی شخصیت میں ٹھہراؤ آیا ہے اور اب وہ پہلے کی نسبت زیادہ سکون سے معاملات کو دیکھتی ہیں۔
فلک شبیر کو ’ابوبکر‘ سے بھی آگے قرار دے دیا
مارننگ شو کے دوران میزبان ندا یاسر نے ڈرامے کے کردار ’ابوبکر‘ کا ذکر کرتے ہوئے کہا کہ فلک شبیر بھی حقیقی زندگی میں اسی کردار جیسے دکھائی دیتے ہیں۔اس پر سارہ خان نے مسکراتے ہوئے دلچسپ جواب دیا اور کہا کہ ’فلک تو ابوبکر کے بھی ابو ہیں۔‘ ان کے اس مزاحیہ تبصرے نے گفتگو کو مزید دلچسپ بنا دیا۔سارہ خان کے اس جملے کو ان کے شوہر کے مزاج اور شخصیت سے متعلق ایک خوشگوار اندازِ بیان کے طور پر دیکھا جا رہا ہے۔
