دنیا بھر کے گیمرز کا طویل انتظار اختتام کے قریب پہنچ گیا ہے، کیونکہ مقبول ویڈیو گیم سیریز ’گرینڈ تھیفٹ آٹو‘ کی نئی قسط ’جی ٹی اے 6‘ کی ریلیز سے متعلق اہم تفصیلات سامنے آگئی ہیں۔
گیم بنانے والی کمپنی راک اسٹار گیمز نے ڈیجیٹل کاپی خریدنے والے صارفین کے لیے پری لوڈ کی تاریخ اور گیم کی اسٹوریج سے متعلق معلومات جاری کردی ہیں۔کمپنی کے مطابق صارفین 10 نومبر 2026 سے جی ٹی اے 6 کی ڈیجیٹل کاپی اپنے کنسولز پر پہلے سے ڈاؤن لوڈ کر سکیں گے، جبکہ گیم کی باضابطہ ریلیز 19 نومبر کو شیڈول ہے۔ اس سہولت کے ذریعے گیمرز ریلیز سے قبل ہی گیم کی فائلز ڈاؤن لوڈ کر سکیں گے تاکہ لانچ کے دن انہیں طویل ڈاؤن لوڈ کا انتظار نہ کرنا پڑے۔
پلے اسٹیشن 5 پر پری لوڈ رات 12 بجے شروع ہوگا
جاری کردہ تفصیلات کے مطابق پلے اسٹیشن 5 پر گیم کا پری لوڈ مقامی وقت کے مطابق رات 12 بجے شروع ہوگا۔ اس طرح ڈیجیٹل کاپی خریدنے والے صارفین ریلیز سے پہلے ہی گیم اپنے کنسول میں انسٹال کرنے کی تیاری مکمل کر سکیں گے۔
جی ٹی اے 6 کے لیے 212 جی بی تک جگہ درکار
جی ٹی اے 6 کے حوالے سے سامنے آنے والی ایک اہم تفصیل اس کا بڑا فائل سائز ہے۔ کمپنی کے مطابق گیم کو ڈاؤن لوڈ اور انسٹال کرنے کے لیے ڈیوائس کے لحاظ سے زیادہ سے زیادہ 212 جی بی خالی اسٹوریج درکار ہو سکتی ہے۔اتنی زیادہ جگہ کی ضرورت کے باعث گیمرز کو اپنے کنسولز میں موجود اسٹوریج کا جائزہ لینا پڑ سکتا ہے۔ جن صارفین کے پلے اسٹیشن 5 یا ایکس باکس میں پہلے سے متعدد بڑی گیمز انسٹال ہیں، انہیں نئی گیم کے لیے کچھ فائلز یا گیمز حذف کرکے جگہ خالی کرنا پڑ سکتی ہے۔
کن کن کنسولز پر دستیاب ہوگی؟
واضح رہے کہ جی ٹی اے 6 کی ریلیز پلے اسٹیشن 5 اور ایکس باکس سیریز X/S کے لیے 19 نومبر 2026 کو شیڈول ہے۔ گیم کی ریلیز سے قبل پری لوڈ کی سہولت فراہم کرنے کا مقصد صارفین کو پہلے سے تیاری کا موقع دینا ہے تاکہ وہ باضابطہ لانچ کے دن ہی گیم کھیل سکیں۔
