ڈائمنڈ جوبلی انٹرنیشنل ٹورنامنٹ میں پاکستان نے میزبان مالدیپ کے خلاف شاندار کارکردگی دکھاتے ہوئے 0-3 سے کامیابی حاصل کر لی ہے اور پوائنٹس ٹیبل پر پہلی پوزیشن بھی اپنے نام کر لی ہے۔
مالے میں کھیلے گئے اس میچ میں پاکستان اور مالدیپ کے درمیان پہلے ہاف میں سخت مقابلہ دیکھنے میں آیا، تاہم دونوں ٹیمیں گول کرنے میں ناکام رہیں اور کھیل بغیر کسی گول کے برابر رہا۔دوسرے ہاف میں پاکستان ٹیم نے جارحانہ کھیل کا مظاہرہ کیا اور مسلسل دباؤ برقرار رکھتے ہوئے تین شاندار گول اسکور کیے۔ پاکستان کی جانب سے عمر نواز، عبدالصمد ارشد اور ہارون حامد نے گول اسکور کیے جنہوں نے ٹیم کی فتح میں اہم کردار ادا کیا۔میچ سے قبل پاکستان ٹیم پر دباؤ تھا کیونکہ ابتدائی میچ میں بنگلادیش کے خلاف مقابلہ برابر رہا تھا، اس لیے مالدیپ کے خلاف ہر حال میں جیت ضروری سمجھی جا رہی تھی۔ ٹیم نے اس دباؤ کو مثبت انداز میں لیتے ہوئے دوسرے ہاف میں شاندار کم بیک کیا۔
اس فتح کے بعد پاکستان کے 4 پوائنٹس ہو گئے ہیں اور وہ گروپ میں پہلی پوزیشن پر پہنچ گیا ہے، جس سے آئندہ مرحلے کے لیے اس کی پوزیشن مضبوط ہو گئی ہے۔ماہرین کے مطابق پاکستان ٹیم نے دوسرے ہاف میں جس نظم و ضبط اور جارحیت کا مظاہرہ کیا، وہ اس کی بہتر حکمت عملی اور فٹنس لیول کی عکاسی کرتا ہے، جو ٹورنامنٹ کے اگلے میچوں میں اس کے لیے اہم ثابت ہو سکتا ہے۔
