امریکی صدر کا فوجی اخراجات میں 12فیصد اضافے کا اعلان

 فوجی اخراجات کو ایک ٹریلین ڈالر بڑھا رہے ہیں، نیشنل گارڈ کو21ایف 15جیٹ طیارے فراہم کریں گے
 مشی گن(آئی این پی )امریکی صدر ڈونلڈ ٹرمپ نے فوجی اخراجات میں12فیصد اضافے کا اعلان کر دیا۔ صدر ڈونلڈ ٹرمپ نے حکومت کے 100دن مکمل ہونے پرمشی گن میں نیشنل گارڈز سے خطاب کرتے ہوئے کہا کہ فوجی اخراجات کو ایک ٹریلین ڈالر بڑھا رہے ہیں، نیشنل گارڈ کو21ایف 15جیٹ طیارے فراہم کریں گے۔ڈونلڈ ٹرمپ نے کہا کہ چین سے منصفانہ ٹیرف معاہدہ کرنے جا رہے ہیں، بھارت اور فرانس امریکا سے ڈیل کرنا چاہتے ہیں، چاہے ٹیرف ایجنڈا نے منڈیوں کو ہلا دیا ہو مگر یہ مضبوط امریکی معیشت کا باعث بنے گا، ہماری مقبولیت میں کمی کا میڈیا جھوٹا پراپیگنڈا کررہا ہے۔انہوں نے مزید کہا کہ میری انتظامیہ کے خلاف فیصلہ دینے والے جج قانون کے نفاذ میں رکاوٹ ڈال رہے ہیں، امریکی سپریم کورٹ صدارتی اختیارات میں مداخلت روکنے میں مدد کرے، جوبائیڈن نے اپنے دور میں سیاسی انتقام کا نشانہ بنایا۔