عمان: اے سی سی مینز انڈر 19 ایشیا کپ میں شرکت کے لیے دفاعی چیمپئن پاکستان انڈر 19 کرکٹ ٹیم عمان پہنچ گئی، جہاں قومی ٹیم فرحان یوسف کی قیادت میں اپنے اعزاز کا دفاع کرے گی۔
پاکستانی انڈر 19 ٹیم آج صبح کراچی سے عمان کے لیے روانہ ہوئی تھی۔ ایونٹ میں قومی ٹیم کی توجہ شاندار کارکردگی کا مظاہرہ کرتے ہوئے ایک بار پھر ایشیائی چیمپئن بننے پر مرکوز ہوگی۔
پاکستان کا گروپ اے میں سخت مقابلہ
پاکستان انڈر 19 ٹیم کو ٹورنامنٹ کے گروپ اے میں شامل کیا گیا ہے، جہاں اسے متحدہ عرب امارات، روایتی حریف بھارت اور نیپال کا سامنا کرنا ہوگا۔شیڈول کے مطابق پاکستان اپنا پہلا میچ 6 نومبر کو متحدہ عرب امارات کے خلاف کھیلے گا۔ قومی ٹیم کا دوسرا اور اہم مقابلہ 8 نومبر کو روایتی حریف بھارت سے ہوگا، جبکہ گروپ مرحلے میں پاکستان کا تیسرا میچ 10 نومبر کو نیپال کے خلاف شیڈول ہے۔بھارت کے خلاف مقابلہ ٹورنامنٹ کے اہم میچوں میں شمار ہوگا، جس میں دونوں ٹیمیں بہتر کارکردگی دکھانے اور کامیابی حاصل کرنے کی کوشش کریں گی۔
12 نومبر کو سیمی فائنلز، فائنل 14 نومبر کو ہوگا
انڈر 19 ایشیا کپ کے دونوں سیمی فائنل مقابلے 12 نومبر کو کھیلے جائیں گے، جبکہ ٹورنامنٹ کا فائنل 14 نومبر کو ہوگا۔پاکستانی ٹیم کی کوشش ہوگی کہ گروپ مرحلے میں اچھی کارکردگی کا مظاہرہ کرتے ہوئے سیمی فائنل تک رسائی حاصل کرے اور پھر فائنل جیت کر ٹائٹل اپنے نام برقرار رکھے۔
پاکستان گزشتہ ایڈیشن کا دفاعی چیمپئن ہے
یاد رہے کہ پاکستان نے انڈر 19 ایشیا کپ 2025 کے فائنل میں بھارت کو یکطرفہ مقابلے کے بعد 191 رنز سے شکست دے کر ٹائٹل جیتا تھا۔ اس شاندار کامیابی کے بعد قومی ٹیم اب دوبارہ میدان میں اتر رہی ہے، جہاں اس کے سامنے گزشتہ کامیابی دہرانے کا چیلنج ہوگا۔
