نوجوان ملک کا مستقبل، کسی بھی بحران میں شعبہ طب کا کردار اہم ہے: بلاول بھٹو

پاکستان پیپلز پارٹی کے چیئرمین بلاول بھٹو زرداری نے لاڑکانہ کی شہید بےنظیر بھٹو میڈیکل یونیورسٹی کے ساتویں کانووکیشن سے خطاب کرتے ہوئے تعلیم اور صحت کے شعبے کی اہمیت پر زور دیا۔

انہوں نے کہا کہ یہ دن صرف اسناد کی تقسیم کا نہیں بلکہ بلاتعطل علاج کی فراہمی کی بھی علامت ہے۔ فارغ التحصیل طلبہ اب عملی زندگی میں قوم کی خدمت کے لیے تیار ہوں اور اپنے صوبے کے مختلف علاقوں میں خدمات انجام دیں۔ بلاول نے زور دیا کہ مشکل حالات میں ڈاکٹرز اور پیرا میڈیکل اسٹاف قوم کے ساتھ کھڑے رہتے ہیں، اور طلبہ کو بلاتفریق انسانیت کی خدمت کو اپنا شعار بنانا چاہیے۔چیئرمین پیپلز پارٹی نے کہا کہ ادارے صرف جدید عمارتوں اور مشینری سے کامیاب نہیں ہوتے، بلکہ جب طلبہ محنت کریں گے اور اچھے ڈاکٹرز اور انسان بنیں گے تو ادارے کامیاب ہوں گے۔ انہوں نے سندھ میں صحت کے شعبے کی بہتری کے لیے نجی شعبے کے ساتھ تعاون کی اہمیت پر بھی روشنی ڈالی اور کہا کہ ہیلتھ کیئر سسٹم کی بہتری ان کی ترجیحات میں شامل ہے۔

اس موقع پر وزیراعلیٰ سندھ مراد علی شاہ نے کہا کہ بےنظیر بھٹو نے 1989 میں یونیورسٹی کا خواب دیکھا تھا جو 2009 میں مکمل ہوا۔ انہوں نے بلاول بھٹو زرداری کا شکریہ ادا کیا کہ انہوں نے اپنی والدہ کے خواب کو پایہ تکمیل تک پہنچایا۔ مراد علی شاہ نے مزید کہا کہ یہ ڈگری صرف طلبہ کی نہیں بلکہ ان مریضوں کی بھی امید ہے جن کا وہ علاج کریں گے۔یہ تقریب ایک موقع تھا جہاں نئے فارغ التحصیل طلبہ کو عملی زندگی میں ذمہ داریوں اور قوم کی خدمت کے لیے تیار کرنے پر زور دیا گیا۔