یورپین پارلیمنٹ نے بدھ کے روز 720 ارکان کے اجلاس میں یورپین کمیشن کے نئے کمشنرز کی توثیق کر دی، جس میں 370 ارکان نے صدر ارسلا واندرلین کی پیش کردہ کمشنرز کے حق میں ووٹ دیا، جبکہ 282 ارکان نے مخالفت کی اور 36 ارکان نے غیر حاضری اختیار کی۔
اس توثیق کے بعد نیا کمیشن یکم دسمبر 2024 سے اپنی پانچ سالہ مدت کے لیے اپنے فرائض کا آغاز کرے گا۔یورپین کمیشن کی صدر ارسلا واندرلین نے اس موقع پر خطاب کرتے ہوئے یورپین یونین کی اہمیت پر زور دیا اور کہا کہ آزادی یورپی یونین کی کلیدی قوت ہے۔ ان کا کہنا تھا کہ آزادی کے لیے لڑنا یورپ کو آپس میں جوڑتا ہے اور یہی ہماری یونین کی بنیاد ہے۔ انہوں نے اس بات پر زور دیا کہ یورپ کو اپنے ماضی، حال اور نسلوں کے تعلقات کو مضبوط بناتے ہوئے مزید متحرک قوت کے طور پر ابھارنا ضروری ہے۔
واندرلین نے اپنے خطاب میں یہ بھی اعلان کیا کہ نئے کمیشن کا پہلا کام "مسابقتی کمپاس" پر عمل درآمد ہوگا، جس کا مقصد امریکا اور چین کے ساتھ یورپ کے جدت طرازی کے فرق کو ختم کرنا ہے۔ انہوں نے اس بات کی اہمیت پر بھی روشنی ڈالی کہ یورپ کو اپنی سیکیورٹی کو مزید مستحکم کرنے کے لیے دفاعی اخراجات میں اضافہ کرنا ہوگا تاکہ عالمی سطح پر اس کی پوزیشن مستحکم ہو۔
نئے یورپین کمیشن کا قیام یورپین پارلیمنٹ میں مسلسل 5 سال کی کوششوں کے بعد مکمل ہوا ہے، اور اس کمیشن کو بین الاقوامی سطح پر یورپ کی پوزیشن کو مزید مستحکم کرنے کے لیے اہم ذمہ داریاں سونپی گئی ہیں۔
