امریکا میں ٹرمپ انتظامیہ نے ایک بڑے ونڈ پاور (ہوا سے بجلی بنانے والے) منصوبے کی تعمیرات روکنے کا حکم دے دیا ہے، حالانکہ یہ منصوبہ تقریباً 80 فیصد تک مکمل ہو چکا تھا۔
یہ منصوبہ امریکی ریاست رہوڈ آئی لینڈ کے ساحل کے قریب بنایا جا رہا تھا اور اس کا مقصد تقریباً ساڑھے تین لاکھ گھروں کو سستی اور صاف توانائی فراہم کرنا تھا۔امریکی بیورو آف اوشین انرجی مینجمنٹ (BOEM) کی جانب سے جاری کیے گئے خط میں کہا گیا کہ یہ اقدام قومی سلامتی کے خدشات کے باعث کیا گیا ہے۔ ادارے نے وضاحت دی کہ جب تک ان خدشات کا جائزہ اور ازالہ نہیں ہو جاتا، منصوبے کی سرگرمیاں دوبارہ شروع نہیں کی جا سکتیں۔یہ ونڈ فارمنگ پروجیکٹ گزشتہ سال شروع ہوا تھا، جب اس کے لیے تمام ضروری حکومتی اجازت نامے حاصل کیے جا چکے تھے۔ منصوبے کی تکمیل کے بعد یہ امریکا میں متبادل توانائی (renewable energy) کے بڑے ترین منصوبوں میں شمار ہوتا اور ماحول دوست توانائی کی پیداوار میں ایک نمایاں اضافہ کرتا۔اب اس منصوبے کی معطلی سے نہ صرف امریکا میں قابلِ تجدید توانائی کے اہداف متاثر ہوں گے بلکہ رہوڈ آئی لینڈ کے ہزاروں گھرانوں کے لیے بجلی کی فراہمی کا منصوبہ بھی کھٹائی میں پڑ سکتا ہے۔
