ویب ڈیسک: چین اور امریکہ کے درمیان جاری ٹیرف وار کے باعث عالمی مالیاتی منڈیوں میں بے چینی میں اضافہ دیکھنے میں آیا ہے، جس کے نتیجے میں سرمایہ کاروں نے محفوظ سرمایہ کاری کے لیے سونے کا رخ کر لیا ہے۔ اس رجحان نے سونے کی قیمتوں کو نئی بلندیوں پر پہنچا دیا ہے۔
پاکستان میں سونے کی قیمت میں ہوشربا اضافہ
پاکستان میں کاروباری ہفتے کے آغاز پر ہی سونے کی قیمت میں 17,000 روپے فی تولہ اضافہ دیکھا گیا، جس کے بعد خالص 24 قیراط فی تولہ سونا 3 لاکھ 90 ہزار روپے کی بلند ترین سطح پر پہنچ گیا ہے۔22 قیراط سونا 3 لاکھ 57 ہزار 500 روپے جبکہ 21 قیراط سونا 3 لاکھ 41 ہزار 250 روپے فی تولہ میں فروخت ہو رہا ہے۔
عالمی مارکیٹ کی صورتحال
عالمی سطح پر بھی سونے کی قیمتوں میں تیزی سے اضافہ ریکارڈ کیا جا رہا ہے، جہاں فی اونس سونا 3,490 ڈالر کی سطح پر ٹریڈ ہو رہا ہے، جو ایک نیا ریکارڈ ہے۔
ماہرین کا تجزیہ
معاشی ماہرین کا کہنا ہے کہ چین اور امریکہ کے درمیان جاری تجارتی کشیدگی، ممکنہ پابندیوں اور مالیاتی غیر یقینی صورتحال کے باعث سرمایہ کار رسک سے بچنے کے لیے سونے کو ترجیح دے رہے ہیں، کیونکہ اسے محفوظ ترین اثاثہ سمجھا جاتا ہے۔ماہرین نے خبردار کیا ہے کہ اگر موجودہ عالمی معاشی صورتحال برقرار رہی تو سونے کی قیمتوں میں مزید اضافہ ممکن ہے، جس کا براہ راست اثر مقامی مہنگائی پر بھی پڑے گا اور اشیائے ضروریہ کی قیمتوں میں اضافے کا خدشہ ہے۔
