بھارتی ریاست راجستھان میں 37 سالہ مکیش کماری کو مبینہ طور پر اس کے فیس بک دوست اور اسکول ٹیچر مانارام نے قتل کر دیا۔
مکیش کماری، جو تقریباً دس سال قبل طلاق یافتہ ہو چکی تھیں، شادی کے لیے 600 کلومیٹر کا سفر طے کر کے باڑمیر پہنچی تھیں۔ دونوں کی دوستی گزشتہ سال اکتوبر میں فیس بک پر شروع ہوئی تھی اور جلد رشتے میں تبدیل ہو گئی۔ مکیش کماری مانارام پر شادی کے لیے دباؤ ڈال رہی تھیں، جبکہ مانارام کی طلاق کا کیس عدالت میں زیر سماعت تھا۔
پولیس کے مطابق 10 ستمبر کو مکیش جب مانارام کے گھر پہنچی اور اپنے تعلقات کا انکشاف کیا، تو دونوں کے درمیان جھگڑا ہوا۔ شام کو مانارام نے مبینہ طور پر لوہے کی راڈ سے مکیش کے سر پر وار کر کے اسے قتل کر دیا اور لاش کو کار میں رکھ کر سڑک کنارے چھوڑ دیا۔
ملزم مانارام نے اپنا جرم قبول کر لیا ہے اور پولیس نے تحقیقات جاری رکھی ہیں۔ مکیش کی لاش ڈسٹرکٹ اسپتال کے مردہ خانے میں رکھی گئی ہے، جہاں ان کے اہل خانہ کے پہنچنے کا انتظار ہے۔
