پاکستان تحریک انصاف (پی ٹی آئی) کی پارلیمانی کمیٹی کا اہم اجلاس طلب کر لیا گیا ہے جس میں آئندہ بجٹ سیشن کے حوالے سے مشاورت کی جائے گی۔
ذرائع کے مطابق پارٹی قیادت نے تمام اراکین قومی اسمبلی کو اجلاس میں شرکت یقینی بنانے کی ہدایت جاری کر دی ہے تاکہ بجٹ کے موقع پر متفقہ اور مؤثر حکمت عملی مرتب کی جا سکے۔یہ اجلاس بیرسٹر گوہر علی خان، عمر ایوب خان اور زرتاج گل کی مشترکہ سربراہی میں منعقد ہوگا۔ پارلیمانی کمیٹی کے اس اجلاس کا مقصد نہ صرف آئندہ مالی سال کے وفاقی بجٹ پر تفصیلی غور کرنا ہے بلکہ حکومت کو ایوان میں بھرپور جواب دینے اور ممکنہ مزاحمتی اقدامات پر بھی مشاورت کرنا ہے۔ذرائع کا کہنا ہے کہ پاکستان تحریک انصاف حکومت کی معاشی پالیسیوں پر سخت تنقید کی تیاری کر رہی ہے، اور بجٹ اجلاس کے دوران بھرپور سیاسی ردعمل اور احتجاج کی حکمت عملی ترتیب دی جا رہی ہے۔
پارٹی قیادت کی جانب سے یہ بھی عندیہ دیا گیا ہے کہ وہ حکومت کی جانب سے ممکنہ عوام دشمن اقدامات کی بھرپور مخالفت کرے گی۔اس ضمن میں پارلیمانی کمیٹی کی جانب سے اراکین کو مختلف شعبوں—جیسے مہنگائی، ٹیکس پالیسی، ترقیاتی فنڈز کی تقسیم اور پیٹرولیم مصنوعات کی قیمتوں—پر تفصیلی نکات تیار کرنے کی ہدایت دی گئی ہے تاکہ بجٹ بحث کے دوران حکومت کو بھرپور ٹف ٹائم دیا جا سکے۔اجلاس آئندہ چند روز میں متوقع ہے، اور اس کے بعد پی ٹی آئی کی حتمی حکمت عملی کا اعلان بھی متوقع ہے۔
