944نئے فلٹریشن پلانٹس لگانے کی تیاریاں

جنوبی پنجاب اور پوٹھوہار ریجن کے چار شہروں میں صاف پانی بوتلوں کے ذریعے فراہمی کیلئے پلانٹ لگانے کا فیصلہ کیا گیا،
 لاہور (خصوصی رپورٹ)پنجاب کے 15 اضلاع میں 944 نئے فلٹریشن پلانٹس کی تنصیب کے پہلے مرحلے کی تیاری ،وزیر ہا ئوسنگ بلال یاسین کی زیر صدارت پنجاب صاف پانی اتھارٹی ہیڈکوارٹرز میں اہم اجلاس ہوا، صاف پانی کی فراہمی یقینی بنانے کیلئے نئے پراجیکٹس بارے تجاویز دی گئیں ،جنوبی پنجاب اور پوٹھوہار ریجن کے چار شہروں میں صاف پانی بوتلوں کے ذریعے فراہمی کیلئے پلانٹ لگانے کا فیصلہ کیا گیا،2 چھوٹے اور ایک بڑے پیمانے پر سرفیس واٹر ٹریٹمنٹ پلانٹ کی تنصیب بھی پی سی ون میں شامل کیا گیا ہے، اجلاس میں پوٹھوہار ریجن میں ڈیم کے پانی کی ٹریٹمنٹ سے صاف پانی کی فراہمی کا بھی تفصیلی جائزہ لیا گیا، اس موقع پر وزیر ہا ئوسنگ بلال یاسین کا کہنا تھا کہ پنجاب کے باسیوں کیلئے صاف پانی کے تاریخی منصوبے مرتب کیے جا رہے ہیں، وزیر ہا ئوسنگ نے دہائیوں سے پنپتے مسائل پر قابو پانے کیلئے پی سی ون جلد از جلد مکمل کرنے کی ہدایات جاری کیں، ان کا مزید کہنا تھا کہ وزیر اعلیٰ پنجاب صوبہ بھر میں صاف پانی کی فراہمی کیلئے پائیدار منصوبہ بندی کی خواہاں ہیں، سالانہ بنیادوں پر پانی کی فراہمی کے نئے پراجیکٹس پر کام کیا جائے گا، پارلیمانی سیکرٹری بیرسٹر سلطان باجوہ اور چیئرمین صاف پانی اتھارٹی زاہد اکرم بھی اجلاس میں شریک تھے۔