ٹی ٹوئنٹی ورلڈ کپ 2026 کو کرکٹ کا ایک بڑا اور دلچسپ ایونٹ سمجھا جاتا ہے، لیکن اب یہ سیاسی تنازعات کی وجہ سے خبروں میں آ گیا ہے۔
امریکی اخبار نیویارک ٹائمز کی رپورٹ کے مطابق بھارت اور سری لنکا کی میزبانی میں ہونے والے اس ٹورنامنٹ سے بنگلادیش نے دستبرداری اختیار کر لی ہے۔ بنگلادیش کرکٹ بورڈ کا کہنا تھا کہ بھارت میں ٹیم کی سیکیورٹی پر خدشات ہیں، تاہم آئی سی سی نے ان خدشات کو تسلیم نہیں کیا۔ بنگلادیش کی جگہ اب اسکاٹ لینڈ کو شامل کیا گیا ہے۔اسی سلسلے میں پاکستان نے بھی بھارت کے خلاف میچ نہ کھیلنے کا اعلان کیا، جو 15 فروری کو سری لنکا میں ہونا تھا۔ پاکستانی وزیر اعظم شہباز شریف نے کہا کہ یہ فیصلہ بنگلادیش کے ساتھ یکجہتی کے طور پر کیا گیا ہے اور کھیل کو سیاست سے دور رہنا چاہیے۔
بھارت اور پاکستان کے درمیان میچ دنیا کے سب سے بڑے کرکٹ مقابلے میں شمار ہوتا ہے، جسے کروڑوں لوگ دیکھتے ہیں، اور اس میچ کے نہ ہونے سے آئی سی سی کو بھاری مالی نقصان کا خطرہ ہے۔ماہرین کا کہنا ہے کہ برصغیر میں کرکٹ ہمیشہ سیاست سے جڑی رہی ہے، اور بھارت اور پاکستان کے درمیان سیاسی کشیدگی کی وجہ سے دونوں ٹیمیں دو طرفہ سیریز نہیں کھیل پاتی۔ بنگلادیش کی عدم شرکت اور پاک بھارت میچ کا نہ ہونا اس ورلڈ کپ کی اہمیت کو کم کر رہا ہے، جس سے شائقین اور عالمی کرکٹ دونوں متاثر ہو سکتے ہیں۔
