فرانس کے مغربی ساحل سے دور واقع سیاحتی جزیرے اولیرون پر ایک شخص نے جان بوجھ کر اپنی گاڑی راہگیروں اور سائیکل سواروں پر چڑھا دی۔
اس واقعے کے نتیجے میں 5 افراد زخمی ہوئے، جن میں سے 2 کی حالت نازک ہے۔پولیس کے مطابق، 35 سالہ مقامی شخص نے گاڑی چڑھانے کے علاوہ بعد میں گاڑی کو آگ لگا دی۔ حملہ آور نے جزیرے کے دو دیہات میں متعدد لوگوں کو ٹکر ماری۔ پولیس نے ملزم کو حراست میں لے لیا ہے اور اسے قتل کی کوشش کے الزام میں تفتیش کا سامنا ہے۔یہ واقعہ مقامی وقت کے مطابق صبح 8:45 بجے پیش آیا اور تقریباً 35 منٹ تک جاری رہا۔ فرانسیسی وزیرِ داخلہ جائے وقوعہ پر پہنچے اور بتایا کہ تحقیقات جاری ہیں تاکہ یہ معلوم کیا جا سکے کہ گاڑی میں گیس سلنڈر موجود تھے یا نہیں۔
وزیرِ داخلہ نے یہ بھی بتایا کہ ملزم کا پولیس کے ریکارڈ میں چھوٹے جرائم کا سابقہ ہے، مگر وہ کسی شدت پسندی یا انتہا پسندی کے شبے میں کبھی زیرِ تفتیش نہیں رہا۔شدید زخمیوں میں ایک 22 سالہ خاتون شامل ہے، جو متعدد چوٹوں کا شکار ہے، اور ایک 69 سالہ سائیکل سوار بھی زخمی ہوا ہے۔ حکام کے مطابق، دیگر لوگ جسمانی طور پر محفوظ رہے، مگر انہوں نے اس واقعے کو اپنی آنکھوں سے دیکھا ہے، جس کے باعث وہ نفسیاتی طور پر شدید متاثر ہیں۔
