انتقال کرنے والے70لاکھ افراد نادرا ریکارڈ میں زندہ نکلے

اکثر لواحقین صرف ڈیتھ سرٹیفکیٹ تک محدود رہتے ہیں ، شناختی کارڈ منسوخ کرانا بھول جاتے ہیں یا اس کی اہمیت سے ناواقف ہوتے ہیں
یونین کونسلوں میں اندراج ہو چکا‘نادرامیں شناختی کارڈ منسوخ نہیں کرائے گئے‘یہ غلطی  سکیورٹی خدشات کو جنم دے سکتی ہے:ترجمان 
 اسلام آباد (آئی این پی )  نیشنل ڈیٹا بیس اینڈ رجسٹریشن اتھارٹی (نادرا)  کے مطابق اس وقت پاکستان میں وفات پانے والے تقریبا 70 لاکھ افراد کے شناختی کارڈز ریکارڈ میں زندہ شمار ہو رہے ہیں۔  میڈیارپورٹ کے مطابق  یہ حیران کن انکشاف نادرا نے یونین کونسلز کے ریکارڈ کے ساتھ موازنہ کرتے ہوئے کیا ہے۔ نادرا  کے ترجمان شباہت علی خان کا کہنا ہے کہ یہ وہ افراد ہیں جن کی وفات کا اندراج متعلقہ یونین کونسلز میں ہو چکا ہے لیکن ان کے ورثا نے نادرا کو باقاعدہ اطلاع دے کر شناختی کارڈ منسوخ نہیں کرائے۔ نادرا حکام کے مطابق جب کوئی شہری وفات پا جائے تو اس کے قریبی رشتہ داروں کی یہ قانونی ذمہ داری ہے کہ وہ ڈیتھ سرٹیفکیٹ حاصل کرنے کے بعد نادرا کو مطلع کریں تاکہ مرنے والے کا شناختی کارڈ منسوخ کیا جا سکے۔شباہت علی خان کا کہنا ہے کہ اکثر لواحقین صرف ڈیتھ سرٹیفکیٹ تک محدود رہتے ہیں، جبکہ شناختی کارڈ منسوخ کرانا بھول جاتے ہیں یا اس کی اہمیت سے ناواقف ہوتے ہیں۔ یہ لاپروائی صرف ایک رسمی غلطی نہیں بلکہ سنگین سکیورٹی خدشات کو جنم دے سکتی ہے۔