لاہور: پاکستان ریلوے نے ننکانہ صاحب میں سالانہ مذہبی تقریبات میں شرکت کے لیے آنے والے مقامی سکھ اور ہندو یاتریوں کی سہولت کے لیے 2 خصوصی ٹرینیں چلانے کا شیڈول جاری کردیا، جبکہ لاڑکانہ سے روہڑی کے درمیان 2 خصوصی شٹل ٹرینیں بھی چلائی جائیں گی۔
ترجمان پاکستان ریلوے کے مطابق ننکانہ صاحب میں منعقد ہونے والی سالانہ مذہبی تقریبات میں شرکت کے لیے ملک کے مختلف علاقوں سے آنے والے یاتریوں کو بہتر سفری سہولیات فراہم کرنے کے لیے خصوصی ٹرینیں چلانے کا فیصلہ کیا گیا ہے۔ریلوے حکام کے مطابق پہلی سکھ اسپیشل ٹرین 20 نومبر کو حیدرآباد سے ننکانہ صاحب کے لیے روانہ ہوگی، جبکہ دوسری خصوصی ٹرین 25 نومبر کو ننکانہ صاحب سے حیدرآباد کے درمیان چلائی جائے گی۔خصوصی ٹرینیں اپنے مقررہ روٹ پر مختلف اہم ریلوے اسٹیشنوں سے گزریں گی، جن میں ٹنڈو آدم، شہدادپور، نواب شاہ، روہڑی، گھوٹکی، خانیوال، فیصل آباد اور شیخوپورہ سمیت دیگر اسٹیشن شامل ہیں۔ اس اقدام سے مختلف شہروں میں مقیم یاتریوں کو مذہبی تقریبات میں شرکت کے لیے آمدورفت کی سہولت میسر آئے گی۔
لاڑکانہ سے روہڑی تک بھی خصوصی شٹل ٹرینیں چلانے کا فیصلہ
پاکستان ریلوے نے سکھ اور ہندو یاتریوں کی سفری ضروریات کو مدنظر رکھتے ہوئے لاڑکانہ سے روہڑی کے درمیان بھی 2 خصوصی شٹل ٹرینیں چلانے کا فیصلہ کیا ہے۔ترجمان کے مطابق یہ خصوصی شٹل ٹرینیں 20 اور 26 نومبر کو چلائی جائیں گی، جس سے سندھ کے مختلف علاقوں سے آنے والے یاتریوں کو ریلوے کے ذریعے سفر کرنے میں آسانی ہوگی۔
اقلیتی برادری کو سفری سہولیات فراہم کرنے کا اقدام
ریلوے حکام کا کہنا ہے کہ پاکستان ریلوے ہر سال کی روایت برقرار رکھتے ہوئے مذہبی تقریبات میں شرکت کرنے والے یاتریوں کو سفری سہولیات فراہم کرے گا۔خصوصی ٹرینوں اور شٹل سروس کا مقصد یاتریوں کو محفوظ، آرام دہ اور بروقت سفری سہولیات مہیا کرنا ہے تاکہ وہ بغیر کسی دشواری کے اپنی مذہبی تقریبات میں شرکت کرسکیں۔
