کوئٹہ اور گردونواح میں موسم سرما کی پہلی بارش نے موسم کا رنگ بدل دیا، طویل خشک سالی کے بعد بارش ہونے سے شہریوں کے چہرے کھل اٹھے جبکہ سردی کی شدت میں بھی اضافہ ہوگیا۔
تفصیلات کے مطابق کوئٹہ شہر اور اس کے نواحی علاقوں میں بارش کا سلسلہ شروع ہوتے ہی موسم خوش گوار ہوگیا۔ طویل عرصے سے بارش نہ ہونے کے باعث خشک موسم کا سامنا کرنے والے شہریوں نے بارش کو خوش آئند قرار دیا۔ بارش سے جہاں موسم میں تازگی آگئی، وہیں سرد ہواؤں کے باعث درجہ حرارت میں بھی کمی محسوس کی جارہی ہے۔محکمہ موسمیات کے مطابق کوئٹہ کے نواحی علاقوں اور پہاڑی مقامات پر موسلادھار بارش کا سلسلہ جاری ہے۔ بارش کے باعث پہاڑی علاقوں میں موسم مزید سرد ہونے کا امکان ہے، جبکہ شہری علاقوں میں بھی سردی کی شدت بڑھ سکتی ہے۔
محکمہ موسمیات نے پیش گوئی کی ہے کہ کوئٹہ اور گردونواح میں بارش کا سلسلہ آئندہ 24 گھنٹوں تک جاری رہنے کا امکان ہے۔ اس دوران بعض مقامات پر تیز بارش بھی ہوسکتی ہے۔طویل خشک سالی کے بعد ہونے والی بارش کو شہریوں نے خوش آئند قرار دیا ہے۔ بارش سے موسم میں خوش گوار تبدیلی آئی ہے جبکہ سردیوں کی آمد کا احساس بھی مزید نمایاں ہوگیا ہے۔شہریوں کا کہنا ہے کہ بارش سے موسم کی خشکی ختم ہونے میں مدد ملے گی اور سرد موسم کا باقاعدہ آغاز محسوس ہونے لگا ہے۔
