ریاض: سعودی عرب کی قیادت میں قائم اتحادی فوج نے دعویٰ کیا ہے کہ یمن کے حوثی باغیوں کی جانب سے مکہ مکرمہ کی سمت بھیجا جانے والا ایک ڈرون فضائی دفاعی کارروائی کے دوران تباہ کر دیا گیا ہے۔
غیر ملکی خبر رساں ادارے رائٹرز کے مطابق سعودی اتحادی فوج کے ترجمان نے اپنے بیان میں کہا کہ ڈرون کا رخ مکہ مکرمہ کی جانب تھا، تاہم سعودی فضائی دفاعی نظام نے بروقت کارروائی کرتے ہوئے اسے اپنے ہدف تک پہنچنے سے پہلے ہی فضا میں تباہ کر دیا۔سعودی حکام کے مطابق یہ کارروائی مقدس شہر کی فضائی حدود اور شہریوں کی حفاظت کے پیش نظر کی گئی۔ تاہم حکام کی جانب سے فوری طور پر یہ تفصیلات فراہم نہیں کی گئیں کہ ڈرون کو کس مقام پر روکا گیا اور اسے تباہ کرنے کے لیے کس نوعیت کا دفاعی نظام استعمال کیا گیا۔
دوسری جانب حوثی باغیوں کی جانب سے سعودی اتحادی فوج کے دعوے پر فوری طور پر کوئی باضابطہ ردعمل سامنے نہیں آیا۔ ماضی میں حوثی قیادت مکہ مکرمہ اور دیگر مقدس مقامات کو نشانہ بنانے کے الزامات کی تردید کرتی رہی ہے۔واضح رہے کہ سعودی عرب اور حوثی باغیوں کے درمیان جاری کشیدگی کے دوران ڈرونز اور میزائل حملوں کے واقعات میں اضافہ دیکھا گیا ہے۔ مکہ مکرمہ کی جانب ڈرون بھیجے جانے سے متعلق سعودی اتحادی فوج کے تازہ دعوے کی آزادانہ تصدیق تاحال سامنے نہیں آئی۔
