ویب ڈیسک: اسپین کے وسطی علاقے ٹولیڈو کے قریب دو ٹرینوں کے درمیان خوفناک تصادم کے نتیجے میں کم از کم 10 افراد ہلاک جبکہ متعدد مسافر زخمی ہوگئے۔
حادثے کے بعد علاقے میں امدادی کارروائیاں شروع کردی گئیں، جبکہ ہلاکتوں میں اضافے کا خدشہ بھی ظاہر کیا جا رہا ہے۔ابتدائی اطلاعات کے مطابق حادثے کی اطلاع ملتے ہی امدادی ٹیمیں جائے وقوعہ پر پہنچ گئیں اور زخمیوں کو طبی امداد فراہم کرنے کے لیے قریبی اسپتالوں میں منتقل کرنے کا سلسلہ شروع کردیا گیا۔ امدادی اہلکار متاثرہ مسافروں کو محفوظ مقامات پر منتقل کرنے اور حادثے سے متاثرہ افراد کو فوری طبی امداد فراہم کرنے میں مصروف ہیں۔حادثے کی شدت کے پیش نظر ہلاکتوں اور زخمیوں کی تعداد میں اضافے کا خدشہ ظاہر کیا جا رہا ہے، تاہم اس حوالے سے حتمی صورت حال امدادی کارروائیوں اور متعلقہ حکام کی مزید تفصیلات سامنے آنے کے بعد واضح ہوگی۔
میڈرڈ اور سیویل کے درمیان ٹرین سروس معطل
حادثے کے بعد حفاظتی اقدامات کے تحت میڈرڈ اور سیویل کے درمیان ریل سروس معطل کردی گئی ہے۔ اس اقدام کے باعث اس روٹ پر سفر کرنے والے مسافروں کو مشکلات کا سامنا کرنا پڑ سکتا ہے۔ریلوے حکام کی جانب سے متاثرہ حصے میں آمدورفت کی بحالی کے لیے صورت حال کا جائزہ لیا جا رہا ہے، جبکہ حادثے کے اسباب اور ٹرینوں کے تصادم سے متعلق مزید تفصیلات کا انتظار ہے۔
