عالمی مارکیٹ میں سونے کی قیمت میں جمعہ کے روز بھی کمی کا سلسلہ جاری رہا، جس کے باعث قیمتی دھات رواں ہفتے مجموعی طور پر 2 فیصد سے زیادہ کمی کے ساتھ ہفتہ وار خسارے کی جانب بڑھ رہی ہے۔
غیر ملکی خبر رساں ادارے کے مطابق اسپاٹ گولڈ کی قیمت میں 0.2 فیصد کمی ہوئی، جس کے بعد سونا 4,270.83 ڈالر فی اونس پر آگیا۔ دوسری جانب امریکی گولڈ فیوچرز کی قیمت 0.2 فیصد اضافے کے بعد 4,305.10 ڈالر فی اونس ریکارڈ کی گئی۔ماہرین کے مطابق عالمی منڈی میں سونے کی قیمت پر دباؤ کی بڑی وجوہات میں امریکی ڈالر کی مضبوطی اور فیڈرل ریزرو کی جانب سے شرح سود بلند رکھنے کے امکانات شامل ہیں۔ ڈالر مضبوط ہونے کی صورت میں دیگر کرنسیوں میں خریداری کرنے والوں کے لیے ڈالر میں قیمت رکھنے والا سونا نسبتاً مہنگا ہوجاتا ہے۔امریکی ٹریژری ییلڈز میں بھی اضافہ دیکھا گیا ہے، جبکہ فیڈرل ریزرو کے بعض عہدیداروں نے مہنگائی پر قابو پانے کے لیے شرح سود میں مزید اضافے کی ضرورت کا عندیہ دیا ہے۔
مارکیٹ میں اکتوبر میں امریکی شرح سود میں اضافے کے امکانات تقریباً 69 فیصد تک پہنچ گئے ہیں۔ ماہرین کا کہنا ہے کہ بلند شرح سود سونے کی طلب کو متاثر کرسکتی ہے، کیونکہ زیادہ شرح سود کے ماحول میں سرمایہ کار ایسے اثاثوں کو ترجیح دے سکتے ہیں جو منافع یا آمدنی فراہم کرتے ہیں۔تاہم دوسری جانب عالمی سطح پر جغرافیائی کشیدگی اور حکومتوں کے بڑھتے ہوئے قرضوں کے باعث سونے کی بطور محفوظ سرمایہ کاری طلب برقرار رہنے کی توقع بھی کی جا رہی ہے۔
دیگر قیمتی دھاتوں کی قیمتوں میں بھی کمی ریکارڈ کی گئی۔ اسپاٹ چاندی 0.5 فیصد کمی کے بعد 63.59 ڈالر فی اونس، پلاٹینم 0.1 فیصد کمی کے بعد 1,746.36 ڈالر جبکہ پیلیڈیم 1.9 فیصد کمی کے بعد 1,249.71 ڈالر فی اونس پر آگیا۔چاندی، پلاٹینم اور پیلیڈیم بھی رواں ہفتے مجموعی طور پر کمی کی جانب گامزن ہیں۔
