ویب ڈیسک:پاکستان فوج کے ترجمان لیفٹیننٹ جنرل احمد شریف چوہدری نے الجزیرہ ٹی وی کو خصوصی انٹرویو میں کہا ہے کہ 6 اور 7 مئی کی شب کی فضائی جنگ پاکستان کی پیشہ ورانہ عسکری مہارت اور تکنیکی برتری کی اعلیٰ مثال تھی۔
انہوں نے کہا کہ یہ جنگ آئندہ دہائیوں تک فوجی اداروں اور فضائی کالجوں میں بطور نصاب پڑھائی جائے گی۔
ڈی جی آئی ایس پی آر کا کہنا تھا:
یہ جنگ پاکستان کی نہیں بلکہ فتح اللہ تعالیٰ کی ہے۔پاکستان کی گلیوں اور شہروں میں عوام کے چہروں پر خوشی اور جشن ہے کیونکہ یہ محض عسکری معرکہ نہیں بلکہ ایک معرکہ حق ہے۔پاکستان نے جھوٹ، فریب، جبر اور بھارتی جارحیت کا پردہ چاک کیا ہے۔
پهلگام واقعے اور بھارت کی من گھڑت کہانی:
انہوں نے کہا کہ بھارت نے پہلگام واقعے کے بعد بے بنیاد الزامات لگائے، مگر پاکستان نے صاف کہا کہ اگر ثبوت ہیں تو انہیں عالمی برادری یا کسی تیسرے قابل اعتماد فریق کے سامنے لایا جائے تاکہ شفاف تحقیقات ہو سکیں۔ بھارت کے پاس کوئی جواب نہیں اور آج تک نہیں ہے۔
بھارتی میڈیا اور جھوٹ:
لیفٹیننٹ جنرل احمد شریف نے کہا کہ بھارت کا میڈیا اور ریاست معلومات کی جنگ میں جھوٹ بول رہے تھے۔ بھارت کے پاس فلم انڈسٹری کی مدد سے نت نئے بیانیے گھڑنے کی صلاحیت ہے، جیسے کہ پاکستان نے گولڈن ٹیمپل پر حملہ کیا، جو کہ سراسر جھوٹ ہے۔ پاکستان سکھ برادری کے مقدس مقامات کا احترام کرتا ہے اور یہاں مسلمانوں اور سکھوں کے درمیان گہرا تعلق ہے۔
پاکستان کی شفافیت اور میڈیا کی آزادی:
انہوں نے کہا کہ پاکستان میں حکومت پر تنقید کرنے والوں کو جیل میں نہیں ڈالا جاتا، میڈیا آزاد ہے، جبکہ بھارت ہزاروں ویب سائٹس بند کرتا ہے اور میڈیا پر پابندیاں لگاتا ہے۔ پاکستان کی فوج اور حکام ہمیشہ سچ بولتے ہیں۔
پاکستان کی فضائیہ اور فوجی ہم آہنگی:
پاکستان ایئرفورس پر فخر ہے۔6 اور 7 مئی کی فضائی جنگ پوری دنیا نے دیکھی اور یہ آئندہ دہائیوں تک سکھائی جائے گی۔پاکستان کے پائلٹس کی پیشہ ورانہ مہارت کو سلام پیش کرتے ہیں۔جے ایف-17 تھنڈر، جے-10 سی طیارے، اور فتح میزائل پاکستان کی تکنیکی ترقی کی مثالیں ہیں۔پاکستان نے اپنی روایتی فوجی طاقت کا مکمل استعمال نہیں کیا، اور دہشت گردی کے خلاف جاری آپریشنز میں مصروف ہے، خاص طور پر بلوچستان اور خیبرپختونخوا میں، جہاں بھارت کی حمایت یافتہ دہشت گردی جاری ہے۔
نتیجہ:
لیفٹیننٹ جنرل احمد شریف چوہدری نے کہا کہ سیاسی قیادت، عوام، اور تینوں افواج کی مضبوط ہم آہنگی نے "بنیان المرصوص" کی دیوار کی مانند بھارتی جارحیت کا مقابلہ کیا ہے، جو پاکستان کی تاریخ کی ایک نمایاں فتح ہے۔
