بسنت پر لاہور میں شہریوں کیلئے فری ٹرانسپورٹ سروس کا فیصلہ

پنجاب حکومت کا بڑا فیصلہ، یونیورسٹیوں اور کالجز سے 600 بسیں حاصل کرلیں
بسیں مختلف مقامات پر شہریوں کو حکومتی بسنت پروگرامزکی سہولت فراہم کریں گی
فری بسیں شہریوں کو بسنت تقریبات تک محفوظ آمدورفت فراہم کریں گی، حکام
لاہور(زیڈ این این) حکومت پنجاب نے بسنت کو رنگا رنگ، محفوظ اور عوام دوست بنانے کے لیے بڑا منصوبہ تیار کر لیا ہے، جس کے تحت بسنت کے موقع پر لاہور میں شہریوں کے لیے فری ٹرانسپورٹ سروس شروع کی جائے گی۔ اس اقدام کا مقصد شہریوں کو سہولت فراہم کرنا اور بسنت کی تقریبات میں زیادہ سے زیادہ عوامی شرکت کو یقینی بنانا ہے، جو حکومت پنجاب کی عوامی فلاح اور ٹریفک مینجمنٹ پالیسی کے عین مطابق ہے۔ذرائع کے مطابق وزیراعلیٰ آفس نے اس سلسلے میں یونیورسٹیوں اور کالجز سے بسیں فراہم کرنے کی درخواست کر دی ہے۔ حکومتی منصوبے کے تحت مجموعی طور پر 600 بسیں حاصل کی جائیں گی، جن میں 500 بسیں یونیورسٹیوں جبکہ 100 بسیں کالجز سے لی جائیں گی۔ یہ فری بسیں لاہور کے مختلف مقامات پر کھڑی کی جائیں گی اور شہریوں کو حکومتی بسنت پروگرامز میں شرکت کے لیے آمد و رفت کی سہولت فراہم کریں گی۔ذرائع کا کہنا ہے کہ حکومت بسنت کے موقع پر شہریوں کی بڑی تعداد کو محفوظ اور منظم انداز میں تقریباتی مقامات تک پہنچانے کا ارادہ رکھتی ہے۔ اس حوالے سے ڈی پی آئی کالجز نے 100 بسوں کی فہرست ہوم ڈیپارٹمنٹ کو ارسال کر دی ہے، جبکہ دیگر تعلیمی اداروں سے رابطے بھی مکمل کر لیے گئے ہیں۔حکام کے مطابق فری ٹرانسپورٹ سروس کا بنیادی مقصد ٹریفک دباؤ کم کرنا، شہریوں کی حفاظت یقینی بنانا اور بسنت کی تقریبات کو خوشگوار اور یادگار بنانا ہے۔ حکومت کا مؤقف ہے کہ اس اقدام سے نہ صرف عوام کو سہولت ملے گی بلکہ شہر میں نظم و ضبط بھی برقرار رہے گا۔