گندم کی امدادی قیمت 4200روپے من مقررکرنے کا مطالبہ

اس سال بھی حکومت نے گندم نہ خریدی تو ملکی غذائی تحفظ کو سنگین خطرہ ہوگا
پاکستان گندم درآمد کرنے کی سکت نہیں رکھتا،کسان اتحاد کا وزیراعظم کو خط 
لاہور(خصوصی رپورٹ)کسان اتحاد پاکستان نے وزیرِاعظم کو گندم کے نرخ اور کسانوں کے مسائل پر خط لکھ دیا، گندم کی قیمت 4 ہزار 200 روپے فی من مقرر کرکے فوری خریداری یقینی بنانے کا مطالبہ کردیا۔ صدر کسان اتحاد خالد حسین باٹھ کی جانب سے لکھے گئے خط میں کہا گیا ہے کہ پچھلے سال حکومت نے گندم کا ریٹ 3 ہزار 900 روپے فی من مقرر کیا تھا، مگر خریداری نہیں کی،اگر اس سال بھی حکومت نے گندم نہ خریدی تو ملکی غذائی تحفظ کو سنگین خطرہ ہوگا، کسانوں پر ناجائز ٹیکس لگا کر 50 لاکھ روپے تک کے غیر منصفانہ بل بھیجے گئے۔خط میں یاد دہانی کرائی گئی ہے کہ پاکستان اربوں ڈالرز کی گندم درآمد کرنے کی سکت نہیں رکھتا، کسانوں کو ان کا جائز حق دیا جائے۔خالد حسین باٹھ نے کہاکہ بجلی کے اضافی بلوں کا فرانزک آڈٹ کرایا جائے، کسان ناجائز ٹیکس قبول نہیں کریں گے، کسانوں کو سستی بجلی فراہم کی جائے تاکہ زرعی شعبہ تباہی سے بچ سکے۔