راولپنڈی میں تین دن سے جاری نان بائیوں کی ہڑتال کے سبب شہریوں کو سخت مشکلات کا سامنا ہے۔
اس ہڑتال کے نتیجے میں گھروں میں روٹیاں بنانے کا سلسلہ شروع ہوگیا ہے۔ علاوہ ازیں، بیکریوں سے رس کیک، بن اور شیر مال کی خریداری میں اضافہ دیکھنے میں آیا ہے۔نان بائیوں نے ہڑتال کا دائرہ پورے پنجاب تک پھیلانے کا اعلان کیا ہے۔ صدر نان بائی ایسوسی ایشن شفیق قریشی کا کہنا ہے کہ وہ جیل بھرو تحریک شروع کرنے جا رہے ہیں کیونکہ سرخ آٹے کی قیمتیں بہت بڑھ گئی ہیں۔ انہوں نے بتایا کہ موجودہ حکومت میں سرخ آٹے کی بوری کی قیمت 5500 سے بڑھ کر 10500 روپے ہوگئی ہے، جبکہ میدہ فائن آٹا کی بوری 6200 سے 12 ہزار روپے تک جا پہنچی ہے۔
شفیق قریشی کا مزید کہنا ہے کہ تنوروں پر جرمانے 50 ہزار سے ایک لاکھ روپے تک کیے جاتے ہیں، اور پنجاب انفورسمنٹ ریگولیٹری اتھارٹی (پیرا) کا رویہ انتہائی توہین آمیز ہے۔ انہوں نے کہا کہ انتظامیہ سے مذاکرات کا کوئی فائدہ نہیں ہو رہا، اور آج اہم اجلاس میں پنجاب بھر میں ہڑتال اور جیل بھرو تحریک کو وسیع کرنے کا فیصلہ کیا جائے گا۔
