پاکستان تحریک انصاف (پی ٹی آئی) کے رہنما اور سابق اسپیکر قومی اسمبلی اسد قیصر نے مطالبہ کیا ہے کہ بانی پی ٹی آئی عمران خان کی بہنوں کو فوری رہا کیا جائے اور سیاسی رہنماؤں کو غیر قانونی حراست میں رکھنے کا سلسلہ بند کیا جائے۔
قومی اسمبلی کے اجلاس میں اظہار خیال کرتے ہوئے اسد قیصر نے شکوہ کیا کہ انہیں ایوان میں بات کرنے کا مناسب موقع نہیں دیا گیا، جس پر انہیں شدید گلہ ہے۔ ان کا کہنا تھا کہ پارلیمنٹ میں تمام ارکان کو اپنا مؤقف پیش کرنے کا یکساں موقع ملنا چاہیے۔اسد قیصر نے اپنے خطاب میں فاروق ایچ نائیک کے بیان کا حوالہ دیتے ہوئے کہا کہ انہوں نے مؤقف اختیار کیا ہے کہ ایمرجنسی کی صورتحال میں کمیٹی تشکیل دینا غیر آئینی ہے۔ اسد قیصر نے سوال اٹھایا کہ کیا پاکستان پیپلز پارٹی اس معاملے پر کوئی قرارداد پیش کرے گی اور کیا اس حوالے سے پارلیمنٹ میں اپنا مؤقف واضح کیا جائے گا۔پی ٹی آئی رہنما نے بانی تحریک انصاف عمران خان کی بہنوں کی رہائی کا مطالبہ کرتے ہوئے کہا کہ انہیں رہا کیا جانا چاہیے۔
انہوں نے ارباب شیر علی کے ساتھ پیش آنے والے واقعے کو بھی انتہائی تشویشناک قرار دیا۔اسد قیصر نے مزید کہا کہ ان کے رہنماؤں کے بارے میں بتایا جائے کہ وہ کہاں ہیں اور انہیں کس قانون کے تحت حراست میں رکھا گیا ہے۔ ان کا کہنا تھا کہ کسی بھی شخص کو قانونی جواز کے بغیر حراست میں رکھنا قابلِ تشویش معاملہ ہے اور اس حوالے سے متعلقہ حکام کو وضاحت دینی چاہیے۔قومی اسمبلی میں اسد قیصر کے خطاب کے دوران سیاسی رہنماؤں کی گرفتاریوں، قانونی حقوق اور پارلیمانی کارروائی میں اپوزیشن کو اظہارِ خیال کا موقع دینے کے معاملات بھی زیر بحث آئے۔
