آزاد کشمیر میں وزیراعظم کے انتخاب کے لیے قانون ساز اسمبلی کا اجلاس آج ہوگا۔
اس سلسلے میں، قائد ایوان کے عہدے کے لیے امیدوار اپنے کاغذات نامزدگی صبح ساڑھے 10 بجے تک جمع کرا سکتے ہیں۔ کاغذات کی جانچ پڑتال کے بعد امیدواروں کی حتمی فہرست جاری کی جائے گی۔اس سلسلے میں، مسلم لیگ (ن) نے بیرسٹر سید افتخار گیلانی کو وزارتِ عظمیٰ کے لیے اپنا امیدوار نامزد کیا ہے، جبکہ پاکستان پیپلز پارٹی کی جانب سے مختار احمد، جو ٹیکنوکریٹ نشست پر منتخب ہوئے تھے، امیدوار ہیں۔ وزیراعظم منتخب ہونے کے لیے امیدوار کو کم از کم 27 اراکین اسمبلی کی حمایت درکار ہوگی، جبکہ اسمبلی میں مسلم لیگ (ن) کے 32 اور پیپلز پارٹی کے 16 ارکان موجود ہیں۔
تاہم، افتخار گیلانی کی نامزدگی پر پارٹی میں شدید اختلافات پائے جا رہے ہیں، اور سابق وزیراعظم راجہ فاروق حیدر نے اسمبلی اجلاس میں شرکت سے انکار کر دیا ہے۔ اس کے علاوہ، شاہ غلام قادر بھی انتخاب سے دستبردار ہو گئے ہیں۔ اسمبلی کے اس اہم اجلاس میں سیاسی سرگرمیاں تیز ہیں اور حمایت و مخالفت کا سلسلہ جاری ہے۔
