وادی نیلم: آزاد کشمیر کی وادی نیلم میں ایک افسوسناک حادثے کے دوران اسکول جانے والی گاڑی بے قابو ہو کر دریائے نیلم میں جا گری، جس کے نتیجے میں 4 بچے جاں بحق جبکہ ڈرائیور سمیت 4 افراد زخمی ہو گئے۔ جاں بحق بچوں میں 3 سگے بھائی بھی شامل ہیں۔
اطلاعات کے مطابق حادثہ وادی نیلم کے علاقے نگدر گھوڑے نکہ کے قریب پیش آیا، جہاں اسکول جانے والی گاڑی اچانک بے قابو ہو کر دریائے نیلم میں جا گری۔ حادثے کے نتیجے میں گاڑی میں سوار بچوں کو شدید نقصان پہنچا اور چار بچے موقع پر ہی دم توڑ گئے۔
امدادی ٹیموں کا ریسکیو آپریشن
حادثے کی اطلاع ملتے ہی پولیس اور امدادی ٹیمیں جائے وقوع پر پہنچ گئیں اور ریسکیو آپریشن شروع کر دیا۔ حکام کے مطابق دریا سے چار بچوں کی لاشیں نکال لی گئیں، جبکہ ڈرائیور سمیت چار زخمی افراد کو فوری طور پر قریبی طبی مرکز منتقل کیا گیا، جہاں انہیں طبی امداد فراہم کی جا رہی ہے۔حادثے کے بعد علاقے میں افسوس کی فضا چھا گئی، جبکہ جاں بحق بچوں کے اہل خانہ پر غم کا پہاڑ ٹوٹ پڑا۔
جاں بحق بچوں میں تین سگے بھائی شامل
ابتدائی تحقیقات کے مطابق گاڑی میں سوار تمام افراد کا تعلق ایک ہی خاندان سے تھا۔ جاں بحق ہونے والے بچوں میں تین سگے بھائی بھی شامل ہیں، جس کے باعث واقعے کی سنگینی میں مزید اضافہ ہوگیا ہے۔حادثے کی وجوہات فوری طور پر سامنے نہیں آ سکیں۔
