تہران: ایران کی پاسداران انقلاب کے ترجمان بریگیڈیئر جنرل حسین محبی نے دعویٰ کیا ہے کہ فورس کی عسکری صلاحیتیں ماضی کے مقابلے میں کم از کم ڈیڑھ گنا بڑھ چکی ہیں، جبکہ جنگ میں شدت آنے کی صورت میں ایسے نئے ہتھیار اور فوجی صلاحیتیں سامنے لائی جائیں گی جو مخالفین کے لیے غیر متوقع ثابت ہوں گی۔
ایرانی میڈیا کے مطابق پاسداران انقلاب کے ترجمان سردار محیبی نے کہا کہ فورس کی عسکری طاقت میں مقداری اور معیاری دونوں سطحوں پر نمایاں اضافہ ہوا ہے۔ ان کے بقول ایران نے دفاعی تیاریوں کو مزید بہتر بنانے کے لیے مختلف شعبوں میں کام جاری رکھا ہوا ہے۔
میزائلوں اور ڈرونز کی پیداوار میں توسیع کا دعویٰ
سردار محیبی کا کہنا تھا کہ ایران میں میزائلوں، ڈرونز اور دیگر فوجی سازوسامان کی پیداوار مسلسل جاری رہی ہے، جبکہ اس میں مزید توسیع بھی کی گئی ہے۔انہوں نے دعویٰ کیا کہ ایرانی ہتھیاروں کی مار کرنے کی رینج، اہداف کو درست نشانہ بنانے کی صلاحیت اور تباہ کن طاقت میں بہتری لائی گئی ہے۔ ان کے مطابق نئے ہتھیاروں کی تیاری کا عمل بھی تیزی سے جاری ہے، جس کا مقصد پاسداران انقلاب کی مجموعی عسکری صلاحیت کو مزید مضبوط بنانا ہے۔
جنگ میں شدت آئی تو نئی صلاحیتیں سامنے لانے کی وارننگ
ایرانی پاسداران انقلاب کے ترجمان نے خبردار کیا کہ اگر جنگ میں مزید شدت آتی ہے تو فورس اپنی ایسی صلاحیتیں سامنے لائے گی جن سے مخالفین کو حیرت ہوسکتی ہے۔ان کا کہنا تھا کہ ایران کے پاس ایسے ہتھیار اور فوجی استعداد موجود ہیں جنہیں ضرورت پڑنے پر استعمال کیا جا سکتا ہے۔ انہوں نے اشارہ دیا کہ موجودہ عسکری صلاحیتوں کے علاوہ مزید جدید نظام بھی تیار کیے جا رہے ہیں۔
ایرانی دفاعی تیاریوں پر زور
سردار محیبی کے بیان میں ایران کی میزائل اور ڈرون ٹیکنالوجی کے ساتھ ساتھ دفاعی پیداوار میں اضافے کو نمایاں کیا گیا ہے۔ ان کے مطابق عسکری صلاحیتوں کو مضبوط بنانے کا عمل جاری ہے اور جنگی حالات میں ضرورت کے مطابق ان صلاحیتوں کو بروئے کار لایا جا سکتا ہے۔
