ویب ڈیسک: بین الاقوامی مارکیٹ میں تیل کی قیمتوں میں کمی اور درآمدی پریمیم میں معمولی کمی کے باعث حکومت کی جانب سے 15 مئی کو پیٹرولیم مصنوعات کی قیمتوں میں کمی کا امکان ظاہر کیا جا رہا ہے۔
ذرائع کے مطابق، اگر موجودہ سیلز ٹیکس اور پٹرولیم لیوی کی شرحوں میں کوئی تبدیلی نہ کی گئی تو:
پیٹرول کی قیمت میں تقریباً 3.5 روپے فی لیٹر
ہائی اسپیڈ ڈیزل (HSD) کی قیمت میں 7 روپے فی لیٹر تک کمی متوقع ہے۔
یہ ممکنہ کمی عالمی مارکیٹ میں تیل کی قیمتوں میں حالیہ کمی کے نتیجے میں ممکن ہوئی ہے، جہاں:
پیٹرول کی قیمت میں 1.5 ڈالر فی بیرل
ڈیزل کی قیمت میں 3 ڈالر فی بیرل کی کمی ریکارڈ کی گئی۔
ذرائع کے مطابق فی الحال:
پیٹرول کی ایکس ڈپو قیمت 252.63 روپے فی لیٹر
ہائی اسپیڈ ڈیزل کی ایکس ڈپو قیمت 256.64 روپے فی لیٹر ہے۔
آئل اینڈ گیس ریگولیٹری اتھارٹی (اوگرا) کی جانب سے نئی قیمتوں کا محکمہ خزانہ کو باضابطہ خلاصہ آج یا کل ارسال کیا جائے گا، جس کے بعد وزارت خزانہ 15 مئی کی شام نئی قیمتوں کا اعلان کرے گی۔
اگر حکومت نے ٹیکس میں کوئی اضافہ یا رد و بدل نہ کیا تو یہ کمی عوام کو کچھ حد تک مہنگائی کے دباؤ سے ریلیف دے سکتی ہے، خاص طور پر ٹرانسپورٹ اور اشیائے خوردونوش کی قیمتوں میں ممکنہ کمی متوقع ہے۔
