زینت امان نے مظہر خان سے شادی کے تلخ تجربات بیان کردیئے

 کامیابی انسان کو اعتماد سکھا سکتی ہے، لیکن دل ٹوٹنے کا تجربہ اپنی حدود متعین کرنا سکھاتا ہے:معروف بھارتی اداکارہ کی گفتگو
ممبئی (شوبز ڈیسک)معروف بھارتی اداکارہ زینت امان نے اپنے دوسرے شوہر مظہر خان سے شادی کے تلخ تجربات بیان کردیے۔74سالہ اداکارہ نے 1985 میں سنگاپور میں مظہر خان سے شادی کی تھی، ان کے مظہر خان سے 2بیٹے، اذان اور زہان ہیں، دونوں نے تقریبا ً12سال ساتھ زندگی گزاری، انہوں نے مظہر خان سے باضابطہ طور پر طلاق تو نہیں لی، لیکن 1998 میں مظہر خان کے انتقال سے قبل وہ انہیں چھوڑ کر چلی گئی تھیں۔ایک حالیہ گفتگو کے دوران زینت امان نے اپنی ازدواجی زندگی اور اس دوران پیش آنے والی مشکلات کا ذکر کیا۔زینت امان نے کہا کہ کامیابی انسان کو اعتماد سکھا سکتی ہے، لیکن دل ٹوٹنے کا تجربہ اپنی حدود متعین کرنا سکھاتا ہے۔ ان کے مطابق صرف محبت ملنا کافی نہیں، اگر عزت نہ ملے تو رشتہ برقرار رکھنا ضروری نہیں۔اداکارہ نے کہا کہ بعض اوقات کسی رشتے سے الگ ہونا خود سے اور ان لوگوں سے محبت کا اظہار ہوتا ہے جو آپ پر انحصار کرتے ہیں،خواتین کو اکثر حالات سے سمجھوتا کرنے اور دوسروں کے رویوں کو برداشت کرنے کی تعلیم دی جاتی ہے، جبکہ اپنی تکلیف کو نظرانداز کیا جاتا ہے۔زینت امان نے کہا کہ کاش وہ پہلے سمجھ پاتیں کہ تکلیف بھی ایک اہم اشارہ ہوتی ہے۔بے وفائی کے موضوع پر گفتگو کرتے ہوئے اداکارہ نے کہا کہ یہ صرف بالی ووڈ تک محدود نہیں بلکہ انسانی کمزوری ہے، تاہم فلمی صنعت میں نجی تعلقات اکثر عوامی تفریح بن جاتے ہیں اور کسی کے دکھ کو افواہوں اور گپ شپ کا موضوع بنانے سے کسی کو فائدہ نہیں ہوتا۔