لاہور میں صبح سویرے ٹھنڈی ہواؤں کے باعث موسم خوشگوار ہوگیا، تاہم فضائی آلودگی نے شہریوں کی مشکلات برقرار رکھیں۔
لاہور آلودہ ترین شہروں کی فہرست میں آٹھویں نمبر پر آگیا، جہاں ایئر کوالٹی انڈیکس (اے کیو آئی) 167 ریکارڈ کیا گیا۔شہر میں صبح کے وقت چلنے والی ٹھنڈی ہواؤں نے موسم کو دلفریب بنا دیا، جبکہ درجہ حرارت میں کمی کے باعث شہریوں نے خوشگوار موسم کا لطف اٹھایا۔ دوسری جانب فضائی آلودگی کی بلند شرح کے باعث حساس افراد کو احتیاط برتنے کی ضرورت ہے۔فضائی آلودگی کے اعداد و شمار کے مطابق اقبال ٹاؤن میں ایئر کوالٹی انڈیکس 210 ریکارڈ کیا گیا، جو شہر کے مختلف علاقوں میں سب سے زیادہ رہا۔ پیراگون سٹی میں اے کیو آئی 187، برکی روڈ پر 179 اور ماڈل ٹاؤن میں 176 ریکارڈ کیا گیا۔اسی طرح ڈی ایچ اے فیز فائیو میں فضائی آلودگی کی شرح 164، چمن پارک میں 163 جبکہ بیدیاں روڈ پر 159 ریکارڈ کی گئی۔
مختلف علاقوں میں آلودگی کی اس سطح کے باعث شہریوں کو بیرونی سرگرمیوں کے دوران احتیاطی تدابیر اختیار کرنے کا مشورہ دیا جاتا ہے۔محکمہ موسمیات کے مطابق لاہور کا موجودہ درجہ حرارت 23 ڈگری سینٹی گریڈ ریکارڈ کیا گیا ہے۔ شہر میں زیادہ سے زیادہ درجہ حرارت 28 ڈگری جبکہ کم سے کم 17 ڈگری سینٹی گریڈ رہنے کا امکان ہے۔موسمی اعداد و شمار کے مطابق ہوا میں نمی کا تناسب 72 فیصد ریکارڈ کیا گیا، جبکہ ہوا 3 کلومیٹر فی گھنٹہ کی رفتار سے چل رہی ہے۔ دن کے دوران سورج اور بادلوں کے درمیان آنکھ مچولی جاری رہنے کا امکان ہے، جس سے موسم مجموعی طور پر خوشگوار رہ سکتا ہے۔
شہریوں کے لیے احتیاطی ہدایات
فضائی آلودگی کے پیش نظر بچوں، بزرگوں اور سانس یا دل کے امراض میں مبتلا افراد کو خصوصی احتیاط برتنی چاہیے۔ آلودگی زیادہ ہونے کے اوقات میں غیر ضروری طور پر طویل وقت باہر گزارنے سے گریز کریں۔ ضرورت پڑنے پر باہر جاتے ہوئے اچھی فٹنگ والا این 95 ماسک استعمال کیا جا سکتا ہے۔
