پاکستان کے معروف گلوکار عاطف اسلم نے اپنی اہلیہ سارہ بھروانہ کی سالگرہ دبئی میں خصوصی انداز سے منائی، جس کی تصاویر سوشل میڈیا پر سامنے آنے کے بعد مداحوں کی توجہ کا مرکز بن گئی ہیں۔
تفصیلات کے مطابق عاطف اسلم نے اہلیہ کی سالگرہ کے موقع پر دبئی کے ایک پُرتعیش ریسٹورنٹ میں خصوصی ڈنر کا اہتمام کیا، جس میں ان کے قریبی دوستوں نے شرکت کی۔ تقریب میں خوشگوار ماحول کے دوران سالگرہ کی خوشیاں منائی گئیں۔اس تقریب میں معروف پاکستانی نژاد برطانوی باکسر عامر خان اور ان کی اہلیہ فریال مخدوم بھی شریک ہوئے۔ ان کی شرکت نے تقریب کو مزید خاص بنا دیا۔عاطف اسلم نے اپنی اہلیہ کے لیے خوبصورت کیک اور پھولوں کے گلدستوں کا انتظام کیا، جب کہ دوستوں کی موجودگی میں سارہ بھروانہ نے سالگرہ کا کیک کاٹا۔ اس موقع پر سارہ بھروانہ سیاہ رنگ کے چمک دار لباس میں دکھائی دیں۔
سالگرہ کی تقریب کی تصاویر سوشل میڈیا پر سامنے آنے کے بعد مداحوں کی جانب سے عاطف اسلم اور ان کی اہلیہ کے لیے نیک تمناؤں کا اظہار کیا جا رہا ہے۔ مداحوں نے سارہ بھروانہ کو سالگرہ کی مبارک باد دیتے ہوئے ان کے لیے خوشیوں اور کامیابیوں کی دعائیں بھی کیں۔عاطف اسلم پاکستان کی موسیقی کی دنیا میں نمایاں مقام رکھتے ہیں، جبکہ ان کی نجی زندگی سے متعلق تصاویر اور سرگرمیاں بھی اکثر مداحوں کی دلچسپی کا باعث بنتی ہیں۔ دبئی میں منعقد ہونے والی یہ سالگرہ کی تقریب بھی اسی وجہ سے سوشل میڈیا پر زیرِ بحث ہے۔
