پیرس: فرانس کے شمال مشرقی علاقے میں تربیتی پرواز کے دوران میراج 2000 ڈی جنگی طیارہ گر کر تباہ ہوگیا، جس کے نتیجے میں عملے کا ایک رکن ہلاک ہوگیا، جبکہ دوسرے اہلکار کی تلاش جاری ہے۔
حادثے کے بعد امدادی ٹیموں نے جائے وقوعہ پر کارروائیاں شروع کردیں اور طیارے کے ملبے کا سراغ بھی لگا لیا گیا ہے۔فرانسیسی فضائیہ کے مطابق حادثہ منگل کی رات مقامی وقت کے مطابق تقریباً 11 بجے پیش آیا، جب طیارہ نینسی کے نواح میں واقع ایئر بیس کے قریب تربیتی پرواز پر تھا۔ حکام نے بتایا کہ طیارہ اچانک گر کر تباہ ہوگیا، جس کے بعد امدادی اہلکاروں کو فوری طور پر جائے حادثہ کی جانب روانہ کیا گیا۔فرانسیسی فضائیہ کے ترجمان کرنل ڈیوڈ پاپالارڈو نے بتایا کہ ابتدائی اطلاعات کے مطابق عملے کا ایک رکن طیارے سے پیراشوٹ کے ذریعے باہر نکلنے میں کامیاب نہیں ہوسکا۔ حادثے میں ہلاک ہونے والے اہلکار کی شناخت اور دوسرے رکن کی موجودگی کے حوالے سے تلاش کا عمل جاری ہے۔
طیارے میں زیرِ تربیت پائلٹ اور تجربہ کار اسلحہ افسر سوار تھے
فرانسیسی فضائیہ کے ترجمان کے مطابق حادثے کے وقت طیارے میں دو افراد سوار تھے، جن میں ایک نوجوان زیرِ تربیت پائلٹ اور دوسرا تجربہ کار اسلحہ افسر شامل تھا۔ دونوں اہلکار تربیتی مشن پر تھے کہ طیارہ حادثے کا شکار ہوگیا۔حکام کا کہنا ہے کہ ڈرون کی مدد سے طیارے کے ملبے کا پتا لگا لیا گیا ہے، جبکہ امدادی اہلکار جائے حادثہ پر موجود ہیں اور لاپتا اہلکار کی تلاش میں مصروف ہیں۔ حادثے کی وجوہات جاننے کے لیے تحقیقات کی ضرورت ہوگی، تاہم فوری طور پر یہ واضح نہیں ہوسکا کہ طیارہ کس وجہ سے گرا۔
میراج 2000 ڈی فرانسیسی فضائیہ کا اہم جنگی طیارہ
میراج 2000 ڈی فرانس کا دو نشستوں والا جنگی طیارہ ہے، جسے فرانسیسی فضائیہ میں 1993 میں شامل کیا گیا تھا۔ یہ طیارہ بنیادی طور پر زمینی اہداف کو نشانہ بنانے اور مختلف فوجی کارروائیوں میں حصہ لینے کے لیے استعمال ہوتا ہے۔فرانس نے اس طیارے کو کوسوو میں 1999 کی فوجی کارروائی، 2011 میں لیبیا میں آپریشن اور افغانستان، عراق، شام سمیت افریقا کے ساحلی خطے میں مختلف فوجی مشنز کے دوران استعمال کیا ہے۔میراج 2000 ڈی کو جدید جنگی ضروریات کے مطابق ڈھالنے کے لیے فرانس نے اس کے نظام اور صلاحیتوں میں بہتری لانے کا پروگرام بھی مکمل کیا ہے۔ فرانسیسی فضائیہ کا ارادہ ہے کہ جدید کاری کے بعد ان طیاروں کو 2030 کی دہائی تک استعمال میں رکھا جائے۔
