کراچی کے بنیادی انفراسٹرکچر کی بہتری کیلئے 10 ارب سے زائد کی منظوری

کراچی کی بڑھتی آبادی اور ٹریفک کے دبا ئوکے پیش نظر مربوط منصوبہ بندی اور ترقیاتی منصوبوں پر فوری کام کریں،  وزیر اعلی مراد علی شاہ 
کراچی(آئی این پی ) وزیراعلی سندھ  سید مرادعلی شاہ نے کراچی کے بنیادی انفرا اسٹرکچر کی بہتری کیلئے 10 ارب روپے سے زائد کی منظوری دیدی۔ وزیراعلی مراد علی شاہ کی زیرصدارت کراچی میگا ڈویلپمنٹ پروجیکٹس پر اجلاس ہوا جس دوران کراچی میں ٹریفک کی روانی، سڑکوں کی بحالی اورٹرانسپورٹ نظام سمیت 10 میگا پروجیکٹس کا جائزہ لیا گیا۔ ترجمان وزیراعلی ہاوس کے مطابق مراد علی شاہ نے کراچی کے بنیادی انفرااسٹرکچر کی بہتری کے لیے 10 ارب روپے سے زائد کے فنڈز کی منظوری دی اور کراچی کے ترقیاتی منصوبے بروقت مکمل کرنے کی ہدایت کی۔ میئر کراچی مرتضی وہاب نے  عظیم پورہ سے لانڈھی مرتضی چورنگی تک متبادل کوریڈور منصوبے پر بریفنگ دیتے ہوئے بتایا کہ یہ کوریڈور منصوبہ 58 کروڑ 20 لاکھ روپے کی لاگت کا ہے اور منصوبے سے ٹریفک شاہراہ بھٹو منتقل ہونے پر رہائشی علاقوں کا دبائو کم ہوگا جس پر وزیراعلی نے وزیربلدیات کو ہدایت کی کہ منصوبہ منظوری کیلئے فوری پیش کیا جائے۔ وزیراعلی مراد علی شاہ کا کہنا تھا کہ کراچی کی بڑھتی آبادی اور ٹریفک کے دبا کے پیش نظر مربوط منصوبہ بندی اور ترقیاتی منصوبوں پر فوری کام کریں۔