اڈیالہ جیل میں آج ایک بڑی سیاسی بیٹھک متوقع ہے، جہاں پاکستان تحریک انصاف (پی ٹی آئی) کے اراکین اور اتحادی جماعتوں کے رہنما بانی پی ٹی آئی عمران خان سے ملاقات کریں گے۔
ذرائع کے مطابق، ملاقات میں پی ٹی آئی کی سیاسی کمیٹی کے اراکین کے علاوہ اتحادی جماعتوں کے سربراہان بھی شامل ہوں گے۔اس ملاقات میں پنجاب اور خیبر پختونخوا (کے پی کے) کی پارٹی قیادت کے اراکین عمران خان سے ملاقات کے لیے آئیں گے۔ جیل ذرائع کے مطابق، ملاقات کے لیے جن افراد کے نام شامل ہیں ان میں علامہ ناصر عباس، صاحبزادہ حامد رضا، عمر ایوب، اسد قیصر، اعظم سواتی، اور حسن یوسفزئی شامل ہیں۔ اس کے علاوہ، کے پی کے سے جنید اکبر اور پنجاب سے ملک احمد بچھڑ بھی ملاقات کے لیے اڈیالہ جیل پہنچیں گے۔
اس اہم ملاقات میں موجودہ ملکی سیاسی صورتحال، اپوزیشن اتحاد، اور کے پی کے اور پنجاب میں تنظیم سازی کے بارے میں بات چیت کی جائے گی۔ اس کے علاوہ، عید کے بعد متوقع تحریک اور اس کے اثرات پر بھی تبادلہ خیال کیا جائے گا۔ گزشتہ جمعرات کو کچھ سیاسی رہنما عمران خان سے ملاقات نہیں کر سکے تھے، لیکن آج یہ ملاقات متوقع ہے۔ملاقات کے دوران اس بات کا جائزہ لیا جائے گا کہ کس طرح پی ٹی آئی اپنی سیاست کو آگے بڑھا سکتی ہے اور ملک میں ہونے والی سیاسی تبدیلیوں پر کیسے ردعمل دے سکتی ہے۔
